Mádenıet jáne aqparat mınıstrligi jáne Astana qalasy ákimdiginiń qoldaýymen qazir Astanada ánshi, akter, aqyn, dramatýrg Qanat Júnis shyǵarmashylyǵynyń «Qoltańba» atty onkúndigi ótip jatyr. Máselen, erteń 19 qazan kúni Á.Mámbetov atyndaǵy memlekettik drama jáne komedııa teatrynda avtordyń «Alash joly» atty dramasy qoıylady.
Avtor shyǵarmashy-lyǵynyń onkúndigi «Sáken» fılm-konsertiniń premerasymen ashyldy. «Kerýen» saýda ortalyǵyndaǵy «Kinopark» kınozalynda kórsetilgen Q.Júnistiń bul týyndysy Q.Qýanyshbaev atyndaǵy Qazaq memlekettik akademııalyq mýzykalyq drama teatry, taǵy basqa óner shańyraqtary ártisteriniń qatysýymen, el azamattarynyń demeýshiliginiń arqasynda túsirilipti.
Tuńǵysh fılm-konsert elordadaǵy Seıfýllın murajaıynda ilýli turǵan aqyn portretiniń tiri Sákenge aınalýynan bastalyp ketedi. Aqyryn ǵana qos esikti aıqara ashqanda ar jaǵynan aqboz atpen án salyp ótip bara jatqan aqyn beınesi kórinedi de, jaılap qana «Syr sandyq» sýretterine ala jóneledi. Kindik qany tamǵan Ortaýdaǵy Seıfollanyń Qarashiliginde bala aqynnyń qııalyn terbegen Sandyqtastan túlep, Oqjetpestiń qııasyna samǵaǵan kartınalar tizbegi Sáken ánderimen kómkerilip, qaıratker ómirine qatysty mańyzdy aqparattarmen ádipteledi. Fılm-konsertte derekti jáne kórkem kınonyń elementteri bar. S.Seıfýllınniń «Taý ishinde», Bizdiń jaqta», «Kókshetaý», «Aqsaq kıik» ánderimen qosa, buǵan deıin tek aqyn túlep-ushqan topyraqta ǵana shyrqalyp kelgen «Babalaryma» ánin Q.Júnistiń ózi shyrqapty. Osyǵan deıin efırge shyǵa qoımaǵan týyndyny Sáken eliniń azamaty, kınoger Ramazan Qurmanbaevtan jańaarqalyq ánshi Ǵalym Muhamedın úırenip, aıtyp júrgenin bilýshi edik. Sáken murasyna asa yjdaǵatpen qaraıtyn Qanat Júnis fılm-konsertine engizip, naqyshyna keltire oryndapty. Jalǵyz Sáken emes, munda Ilııas pen Beıimbettiń obrazdary somdalyp, úsh arystyń tulǵasy jarasymdy kórinis tapqan.
Aqqýdyń ary men jazyqsyz kıiktiń janyna atylǵan oq qazaq dalasynda áýeli Sáken júregine tıgendeı áser qaldyratyn tuńǵysh fılm-konsert aqyn rýhynyń bir kórinisi ispettes.