Esil University-de «Seıitqasymov oqýlary – 2024» Halyqaralyq ǵylymı-tájirıbelik konferensııasy ótti. Atalǵan oqý ordasynyń alǵashqy rektory Ǵabdyǵapar Saǵıtulynyń ǵylymı murasyn dáripteýge arnalǵan jıyn bıyl ýnıversıtettiń 25 jyldyǵyna oraı uıymdastyryldy.
Saltanatty is-sharany Esil University rektory Aıapbergen Taýbaev ashyp, bul konferensııa ekonomıka salasynyń damý qarqynyn talqylaýǵa tamasha múmkindik ekenin atap ótti. Keleli keńeske joǵary oqý oryndarynyń ókilderi, qoǵam qaıratkerleri, sondaı-aq Indonezııa, Malaızııa, Majarstan, Reseı jáne О́zbekstannan kelgen sheteldik qonaqtar qatysyp, qarjy-ekonomıka taqyrybynda pikir almasty.
Ǵylymı jıyn barysynda Ulttyq banktiń tuńǵysh tóraǵasy Ǵalym Baınazarov «Aqsha-kredıt júıesiniń qazirgi máseleleri» taqyrybynda baıandama jasap, elimizdiń turaqty ekonomıkalyq ósýin qamtamasyz etý maqsatynda aqsha-kredıt saıasatyn jahandyq ózgeristerge beıimdeý qajettigine basa nazar aýdardy. Sondaı-aq konferensııa aıasynda zań ǵylymdarynyń doktory, Esil University quqyq kafedrasynyń professory Alpysbaı Júsipov «Zamanaýı bilim berýdegi quqyqtyq ınnovasııalar» taqyrybynda sóz sóılep, sıfrlyq transformasııa jaǵdaıynda oqytý júıesin jańǵyrtýdyń mańyzdylyǵyna erekshe nazar aýdardy.
Aıta keteıik, «Seıitqasymov oqýlary» Halyqaralyq ǵylymı-praktıkalyq konferensııasy jyl saıyn dástúrli túrde uıymdastyrylady. Bıyl besinshi márte ótken jıynda 202 baıandama usynylsa, shetelden kelgen ǵalymdardyń halyqaralyq yntymaqtastyq pen tájirıbe almasýǵa baǵyttalǵan 30 ǵylymı eńbegi talqylandy.