Batys Qazaqstan oblysy, Oral qalasyndaǵy Serebrıakov orta mektebiniń ákimshiligi mekteptiń 75 pedagogynan bıýdjetten artyq tólengen 42 mln teńge kólemindegi jalaqyny óndirip alý týraly sotqa talap aryz joldaǵan, dep habarlaıdy Egemen.kz Joǵarǵy Sottyń baspasóz qyzmetine silteme jasap.
Aıta keteıik, talap qoıý kezinde memlekettik aýdıttiń qorytyndysy negizge alynǵan. Tergeý organymen mekteptiń bas býhgalterine qatysty qylmystyq is qozǵalyp, Oral qalalyq sotynyń sheshimimen ol kináli dep tanylyp, jaza taǵaıyndalǵan.
«Qylmystyq is aıasynda mektepke júrgizilgen memlekettik aýdıt nátıjesinde 2021-2022 jyldary 75 pedagogqa jalaqy boıynsha 42 mln teńge kóleminde artyq tólemder negizsiz aýdarylǵan, sóıtip, qarjylyq quqyq buzýshylyq anyqtalyp, debıtorlyq qaryz eseptelgen», delingen sot habarlamasynda.
Alaıda, sotta mektep ákimshiliginiń ókilderi pedagogtardyń qandaı da bir quqyqqa qarsy áreketter jasaǵanyn, sonyń saldarynan olarǵa artyq qarajat aýdarylǵanyn dáleldeıtin dáleldemelerdi usyna almaǵan. Osyǵan baılanysty №2 Oral qalalyq soty mekteptiń talap qoıýyn qanaǵattandyrýsyz qaldyrǵan. Sonymen qatar sot jumysqa nemquraıly qaraý nemese býhgalterlik qatelik bolmaǵan jaǵdaıda eńbek jáne azamattyq zańnamada kórsetilgendeı, artyq tólengen somany qaıtarýǵa negiz joq ekenin atap kórsetti.
Apellıasııa mektep ókiliniń shaǵymyn qanaǵattandyrmaı, sot sheshimin ózgerissiz qaldyrǵan.