Atyraý oblysynda «Jaıly mektep» ulttyq jobasy aıasynda 12 bilim ordasy salynyp jatyr. Sonyń ekeýi jumysyn bastady.
Oblys ákimi baspasóz qyzmetiniń aqparatyna qaraǵanda, jańa mekteptiń biri Almaly aýyldyq okrýgindegi Bereke aýlynda ashyldy. Munaıly shaharǵa jaqyn ornalasqan eldi mekendegi bul bilim ordasy 1 200 orynǵa eseptelgen. Al Saryózek shaǵyn aýdanynda jumys bastaǵan mektep 300 oqýshyny qabyldaıdy.
«Memleket basshysy Qasym-Jomart Toqaev tabysty ult bolýdyń mańyzdy sharty retinde ár oqýshynyń sapaly bilim alýyna, jan-jaqty damýyna qolaıly jaǵdaı jasaýdy tapsyrdy. Ulttyq jobamen salynǵan bilim ordasynda shákirtterdiń barlyq pándi oqyp-úırenýine, ustazdardyń shyǵarmashylyqpen aınalysýyna tolyq jaǵdaı jasaldy. Bul mektepterde muǵalim men oqýshynyń, mektep pen ata-ananyń baılanysy artyp, bilimdi, talantty, sanasy sergek, oıy ushqyr, básekege qabiletti jas urpaq tárbıelenip shyǵaryna senemin», dedi oblys ákimi Serik Shápkenov.
Jańa mektepterde 3 myń oqýshy eki aýysymda oqıdy. Olarǵa 120-dan astam ustaz dáris beredi. Máselen, Bereke aýlyndaǵy mektepte Hanshaıym Kópbergenovanyń 8 nemeresi bilim alady. Ájeı nemereleriniń jańa mektepte oqıtynyna qýanyp júr.
«Aýlymyzda kópten kútken jańa mektep ashyldy. Mekteptiń qurylysy bastalyp, aıaqtalǵanǵa deıin kýá boldyq. Endi balalardy qabyldap jatyr. Men de, basqa ata-analar da dán rızamyz. Sebebi buǵan deıin nemerelerim osy aýyldaǵy mektepte oqydy. Biraq oryn sany tapshy edi. Bul másele oń sheshimin tapty. Jańa mektepte balarymyzdyń zeıini ashylsyn», deıdi H.Kópbergenova.
Mektepterge jedel basqarý ortalyǵyna qosylǵan beınebaqylaý kameralary ornatylǵan. Al erekshe balalarǵa kedergisiz orta qalyptastyrylyp otyr. Bastaýysh jáne joǵary synyp oqýshylaryna bólek bloktar salynǵan. Bilim ordasynyń aýmaǵynda 2 júgirý jolaǵy, basketbol, voleıbol alańdary bar. Tennıs korty, oıyn jáne workout alańdary da jabdyqtalǵan. Al ǵımarattarda 2 sport zaly, bastaýysh jáne joǵary synyp oqýshylaryna arnalǵan eki ashana, 260 oryndyq májilis zaly jáne kitaphana bar. Bilim ordasynda psıholog, logoped, medısına kabınetteri, zamanaýı úlgidegi oqý synyptary, fızıka, hımııa zerthanalary jáne STEM kabıneti qajetti quraldarmen jaraqtalǵan.
Oblys ákimi Serik Shápkenovtiń aıtýyna qaraǵanda, «Jaıly mektep» ulttyq jobasy aıasynda jyl sońyna deıin taǵy úsh mektep paıdalanýǵa beriledi. Aldaǵy jyldyń sońynda jaıly mektepterdiń sany 12-ge jetedi. Eń ozyq úlgimen salynyp jatqan jańa mektepter iske qosylǵanda, onda 12 myńnan astam oqýshy sabaqqa barady.
Oqýshylardy bilim nárimen sýsyndatyp júrgen ustazdardyń eńbegin baǵalaýǵa betburys jasaldy. Máselen, bıyl Atyraý oblysynda 88 muǵalim «Y.Altynsarın» tósbelgisine ıe boldy. Olardyń bárinde sheber sanaty bar.
«Memleket basshysy «Pedagog – ulttyń jańa sapasyn qalyptastyrý úderisindegi eń mańyzdy býyn» degen bolatyn. Demek, muǵalimge júktelgen jaýapkershilik júgi jeńil emes. Keıingi jyldary óńirde bilim deńgeıiniń kórsetkishi artyp, oqýshylar túrli dodada aldyńǵy qatardan kórinip keledi. Bul – oqýshy zeıinin ashyp, bilim shyraǵdanyn jaqqan izdenimpaz, kreatıvti, bilimdi ustazdar eńbeginiń jemisi», deıdi S.Shápkenov.
Sondaı-aq mektepterge 1 myń ınteraktıvti taqta satyp alyndy. Qazir oqý oshaqtaryndaǵy mundaı taqtalar sany 2 myńǵa jýyqtady. Atyraý oblystyq bilim basqarmasynyń basshysy Marat Ábýovtiń aıtýynsha, ınteraktıvti panelder 7 aýdan men oblys ortalyǵynda ornalasqan bilim uıalaryna taratylyp jatyr.
«Interaktıvti taqtalardyń 500 danasy Atyraý qalasyndaǵy mektepterge ornatylady. Al Inder aýdanyna osyndaı 45 taqta jiberiledi. Isataı men Mahambet aýdanyna 60 danadan beriledi. Qurmanǵazy aýdanyna – 57, Qyzylqoǵaǵa – 56, Jylyoıǵa – 50, Maqat aýdanyndaǵy mektepterge 39 taqta jetkiziledi. Gımnazııa men lıseılerge – 83, tehnıkalyq bilim beretin kolledjderge 50 taqtany berý kózdelip otyr», dep habarlady M.Ábýov.
Onyń aıtýyna qaraǵanda, mundaı taqtalar burynda da alynǵan. Al bıyl Inder jáne Mahambet aýdanyndaǵy, oblystyq gımnazııa men lıseılerdegi ınteraktıvti panel tapshylyǵy máselesi tolyqtaı sheshimin tapty.
«Jalpy, ınteraktıvti taqta bilim berý úderisiniń qyzyqty ári tartymdy ótýine múmkindik beredi. Atalǵan taqtanyń kómegimen muǵalim túrli oqý materıalyn vıdeomen kórsetip, 3D formatty qoldana alady. Bul balalarǵa qajetti aqparatty jeńil ári túsinikti jetkizýge jol ashady. Muǵalimniń ashyq sabaqty onlaın formatta ótkizýine múmkindik bar», dep málim etti M.Ábýov.
Atyraý oblysy