Qostanaıdaǵy O.Qozybaev pen Iý.Jýravleva kósheleriniń túıisken tusyndaǵy ashyq alańqaı oblystyq Tótenshe jaǵdaı departamentiniń qaraýyna bekitilgen edi. Osy alańqaıdy jazdaı qutqarýshylardyń ózderi kógaldandyryp, áp-ádemi demalys orny etip jasap qoıdy. Atalǵan alleıa Qutqarýshylar kúni qarsańynda ashylyp, tótennen týyndaǵan qaýipti sátterde basyn qaterge tikkenderdi eske alǵan jıyn ótti.
Saltanatty is-sharaǵa TJD qyzmetkerleri men ardagerler, alleıa mańaıyndaǵy turǵyndar qatysty. Departament basshysy Dámir Ermaǵanbetov kópshilikke quttyqtaý sóz arnap, bul jerdiń jaı demalys orny ǵana emes, sonymen qatar qoǵam qaýipsizdigi jolynda qyzmet etken qutqarýshylardyń erligine qoıylǵan eskertkish ekenin atap ótti.
«Qutqarýshylar alleıasy» – qutqarýshylardyń syn saǵattarda kórsetken erligi men jankeshti eńbeginiń rámizdik nyshany. Olardyń eńbegi qoǵamda asa mańyzdy. Qutqarýshylar kúndelikti qyzmet barysynda kútpegen jerden tutanǵan órtpen arpalysyp, adam ómirine arasha túsedi, tabıǵı apattardyń zardaptaryn joıýmen, evakýasııalaýmen aınalysady, alǵashqy kómek kórsetedi», dedi TJD basshysy.
Alleıa aýmaǵynda qutqarýshylarǵa arnalǵan eskertkish arka, órt sóndirý kóliginiń shaǵyn maketi qoıylǵan.
Qostanaı oblysy