Fransııada 17-19 qazan aralyǵynda tolassyz jaýyn jaýyp, eldiń ortalyq bóligin sý basty, dep jazady Egemen.kz.
Fransııalyq BAQ mundaı topan sý el aýmaǵynda keıingi 40 jylda bolmaǵanyn atap ótti.
Al fransýz meteorologtary ońtústiktegi Ardesh jáne Lozer aımaǵynyń keıbir aýdandarynda 48 saǵat ishinde 700 mıllımetrge deıin jańbyr jaýǵanyn málimdedi.
Fransııa premer-mınıstri Mıshel Barneniń aıtýynsha, tótenshe jaǵdaı bolǵan ýaqytta mamandar 2300-ge jýyq qutqarý operasııasyn ótkizgen. 1000-nan asa adam evakýasııalanǵan.
«Biz klımattyń osyndaı tosyn minezine daıyn bolýymyz kerek. Men tótenshe jaǵdaılarǵa Eýropa elderi birige aldyn alý sharalaryn uıymdastyrý kerek dep oılaımyn. Tájirıbe kórsetkendeı topan sýdyń saldarymen emes, aldyn ala sebebin anyqtap, oǵan jol bermeý ekonomıkalyq turǵyda da áldeqaıda tıimdi», dedi Fransııa premer-mınıstri.
Sondaı-aq, sý tasqyny kezinde Lıon men Sent-Eten qalalary arasynda temir jol qatynasy úzilgen. Kúre joldy da sý shaıýyna baılanysty kólik qatynasy toqtatylǵan.
19 qazan kúni Meteo-Fransııa kún raıynyń qolaısyzdyǵyna baılanysty qoıylǵan qaýiptiń qyzyl belgisin joıdy. Desede ońtústik-batys aýdandarda áli de nóser jaýyn saldarynan sý tasqyny bolýy múmkin ekenin eskertti.
Búginde el aýmaǵyn sýdan tazartý, ınfraqurylymdy qalpyna keltirý jumystary bastalyp ketken.