Bıyl kórnekti balalar jazýshysy, ǵalym Búrkit Ysqaqovtyń týǵanyna 100 jyl tolyp otyr. Balalar ádebıetiniń damýyna ólsheýsiz úles qosqan ol – ataqty ESEP partııasyn qurýshylardyń biri. Avtordyń «Otan» óleńin mektepte oqymaǵan, jattamaǵan qazaq balasy joq shyǵar. Qalamgerdiń ǵasyrlyq toıynda Abaı atyndaǵy Qaraǵandy oblystyq balalar kitaphanasy ıgi is-sharanyń uıytqysy boldy.
Qaraǵandy oblysy-nyń mádenıet, arhıvter jáne qujattama basqarmasynyń qoldaýymen qarymdy qalamgerdiń mereıli jylyna toqaılastyryp, kitaphana ujymy naýryz aıynan bastap qazan aıyna deıin «Shabyt shýaǵy» atty oblystyq sahnalyq qoıylym baıqaýyn jarııalaǵan edi. Qorytyndysy Sáken Seıfýllın atyndaǵy Qaraǵandy oblystyq akademııalyq qazaq drama teatrynda ótip, dramatýrgtiń «Álimniń álegi», «Shyt kóılek», «Eki oqýshy», «Aǵalyq aqyl» atty pesalaryn sahnalady.
Bul ıgilikti is-sharaǵa Almatydan arnaıy kelgen qazaq radıosynyń ardageri Aıgúl Búrkitqyzy jas órenderdiń qazylyǵyna tóraǵalyq etti.
– Ákem – sońynan iz qaldyrǵan, sóz qaldyrǵan tulǵa. Onyń jazbalary, óleńderi atyn óshirgen joq. Oblystyq deńgeıde alǵash ret nasıhattalyp jatyr. Soǵan Alataýdan kóńilim alyp-ushyp arnaıy keldim. Pesalaryn qarashańyraq Sáken teatrynda jas ónerpazdar óte joǵary deńgeıde sahnalap shyqty. Ár pesasy ónegege toly eken, – deıdi aqynnyń qyzy.
О́renderdiń ónerine E.Bóketov atyndaǵy Qaraǵandy zertteý ýnıversıtetiniń doktoranty Ádilet Jaǵypar, Qaraǵandy memlekettik medısına ýnıversıtetiniń ustazy, fılologııa ǵylymdarynyń kandıdaty, professor Baıan Ibraeva, Mádenıet qaıratkeri, S.Seıfýllın atyndaǵy Qaraǵandy oblystyq akademııalyq Qazaq drama teatrynyń akteri, rejısser Bekmuhamet Kıekbaev baǵa berdi.
Sonymen «Shabyt shýaǵy» oblystyq sahnalyq qoıylym baıqaýynda I oryndy Nura aýdany, Izendi aýylynyń talantty oqýshylary ıelendi. II orynǵa Qaraǵandy qalasyndaǵy J.Aqbaev atyndaǵy jalpy bilim beretin mektep oqýshylary laıyq dep tanyldy. III oryndy Osakarov aýdany Molodejnyı kentiniń mektebi men Qaraǵandydaǵy №36 joǵary mektep oqýshylary ıelendi.
Munymen qosa, jan-jaqtan pesany sahnalap ákelgen baldyrǵandarǵa arnaıy atalym boıynsha da marapat tabystaldy. «Úzdik qoıylym» atalymy M.Mamyraev atyndaǵy №68 mektep-ınternatyna buıyrsa, «Úzdik dekorasııa» atalymyna Prıozersk qalasy №2 mektep laıyq dep tanyldy. №53 mektep-lıseıiniń oqýshysy Sabyr Shyńǵys «Úzdik akter», Aqtoǵaı aýdanyndaǵy K.Baıseıitova atyndaǵy mekteptiń oqýshysy Dilnaz Saǵyndyq «Úzdik aktrısa» atandy. «Úzdik obraz» atalymyn Qaraǵandydaǵy Ǵ.Mustafın atyndaǵy mektep oqýshysy Rınat Ǵalymjan jeńip aldy.
Aıgúl Búrkitqyzy shalǵaı aýyldardan kelgen talapty balalarǵa óz atynan qarjylaı syılyq tartý etti. Jeńimpazdar men júldegerlerge oblystyq mádenıet, arhıvter jáne qujattama basqarmasynyń arnaıy dıplomy men qarjylaı syılyǵy úlestirildi.
Aıdyń aıaǵynda aqynnyń týǵan jeri Nura aýdanynda «Búrkit Ysqaquly: tulǵa taǵylymy men tarıhı zamany» atty respýblıkalyq ǵylymı–praktıkalyq konferensııa ótetini belgili boldy.
Akademık Muhamedjan Qarataev: «Búrkit Ysqaqovtyń «Tas edenniń yzǵary» atty óleńder toptamasynyń qazaq poezııasynan alatyn orny erekshe. Onyń bul óleńderinen Sákenniń syry, Beıimbettiń muńy, Ilııastyń úni estilgendeı bolady», dep baǵa bergen.
Kúresker tulǵanyń esimi kómeskilenbeı, aty respýblıka kóleminde ardaqtalýy kerek dep oılaımyz.
Qaraǵandy oblysy