Premer-mınıstrdiń orynbasary Serik Jumanǵarın Almatyda ótken «Qazaqstan-Aýǵanstan» bıznes-forýmynyń ashylýyna qatysty.
Qazaqstan men Aýǵanstan arasynda saýda salasyndaǵy yntymaqtastyqty damytýǵa zor áleýet bar. Atap aıtqanda, Aýǵanstanǵa astyq pen un eksportyn keńeıtý jáne aýǵan jemis-jıdekterin, kókónisterdi, keptirilgen jemister men basqa da tamaq ónimderin ımporttaý. Sonymen qatar elimiz Aýǵanstannyń ekonomıkalyq damýyna jáne osy eldiń halyqaralyq kólik dálizderine qosylýyna múddeli. 2024 jyldyń birinshi jartyjyldyǵynyń qorytyndysyna sáıkes Aýǵanstannan elimiz arqyly tranzıttik avtotasymaldaý kólemi 8%-ǵa artyp, 5 myń tonnadan asty. Byltyr tranzıtpen 10 myń tonnadan asa adam ótti.
«Bizdiń elderimizdiń arasynda Túrikmenstan men О́zbekstan arqyly ótetin temirjol dálizi bar. Biz Transaýǵan dálizi arqyly eksporttyq júkterimizdi tranzıtteýge múddelimiz. Pákistannyń (Karachı, Gvadar) teńiz porttary arqyly biz úshin Taıaý Shyǵys, Ońtústik-Shyǵys Azııa, Úndi muhıty elderiniń naryqtary ashylýda», dep atap ótti S. Jumanǵarın.
Aýǵan tarapyna Qazaqstan aýmaǵy arqyly Qytaıǵa aýǵan taýarlarynyń kedergisiz tranzıti maqsatynda «Khorgos Gateway» qurǵaq portyn logıstıkalyq hab pen konteınerler men avtokólik quraldaryn salý úshin paıdalaný usynyldy.
Sonymen qatar S.Jumanǵarın men Aýǵanstannyń saýda jáne ónerkásip mınıstri Nurıddın Azızı ózara taýar aınalymyn 3 mlrd dollarǵa deıin jetkizý jónindegi Jol kartasyna qol qoıdy. Qujat saýda-ónerkásip, bank, taý-ken metallýrgııasy, gýmanıtarlyq jáne áleýmettik salalardaǵy, energetıka sektoryndaǵy, kólik jáne logıstıkadaǵy, sıfrlandyrýdaǵy, týrızmdegi jáne basqa da salalardaǵy yntymaqtastyq baǵyttaryn aıqyndaıdy.