Budan bylaı menshiginde ekinshi deńgeıli bankterdiń 5 kartasy bar azamattar baqylaýǵa alynady. «Astana» halyqaralyq qarjy ortalyǵynda (AHQO) tirkelmegen bırjalarǵa tólem jasaıtyn bolsa, osy kartalar arqyly júrgizilgen operasııalar tekseriledi. Bul týraly «Ashyq NQA» portaly talqylaýǵa shyǵarylǵan qujatta jazylǵan.
Shart qatańdap, shekteý kúsheıedi
Qarjy naryǵyn retteý jáne damytý agenttigi bankterdi (QNRDA) AHQO-da tirkelmegen sıfrlyq bırjalarǵa tólem jasaýdan, aqsha aýdarýdan avtomatty túrde bas tartýǵa mindettep otyr. Osy talaptyń nátıjesinde esirtki men sıfrlyq aktıvterdiń zańsyz aınalymyna, bank ónimderin paıdalaný táýekeline tosqaýyl qoıylmaq. Sóıtip, bankter esirtkiniń zańsyz óndirilýi, aınalymy men tranzıti, AHQO qatysýshysy emes qoldanýshylar, elektrondy kazıno men ınternet-kazıno paıdasyna tólem júrgizýden bas tartady. Sondaı-aq 21 jasqa tolmaǵan jeke tulǵalardyń oıyn bıznesin uıymdastyrýshylarǵa paıda ákeletin aqsha aýdarymdaryn júrgizýden aýlaq bolady.
Sıfrlyq aktıvter bırjalarynyń paıdasyna tólem júrgizýdiń de joly kesiledi. Sonymen qatar ekinshi deńgeıli bankter bir klıentke 5 kartadan artyq kartamen tólem operasııalaryn júrgizýge tyıym salmaq. Lımıt aıyna 100 myń teńgege deıin 3 tólemnen aspaýy kerek.
– Bank elimizdiń beırezıdentteri – atalǵan bank shyǵarǵan tólem kartochkalaryn ustaýshylar, esirtkilerdiń zańsyz óndirilýi, aınalymy, tranzıti negizinde kiristi jylystatý, terrorızmdi qarjylandyrý táýekeli joǵary elderdiń rezıdentterine kiretin klıentterdiń, elde bolý negizdiligin rastaıtyn qujattardy (eńbek shartyn, oqý shartyn, elde shetel azamatynyń turý yqtııarhaty men basqa da qujattardy) tekseredi, – dep jazylǵan qujatta.
Demek tekseris barysynda besten kóp tólem kartasy bar klıentten qandaı da bir kúdikti operasııalar anyqtalsa, bank qarajattyń shyǵý kózine tekseris júrgizýge mindetti. Oǵan qosa, qylmystyq jolmen alynǵan kiristerdi zańdastyrýǵa, terrorızmdi qarjylandyrýǵa qarsy is-qımyl týraly zańnamanyń talaptarynda belgilengen sharalardy ustanýy qajet. Mundaıda kúdikti operasııalar týraly qarjylyq monıtorıng jónindegi ýákiletti organǵa aqparat jiberiledi.
Alaıaqtar alǵan nesıe keshiriledi
Bıyl elimizde fıshıng shabýyldarynyń sany 7,5 ese artqan. Qansha adamdy ózderi rásimdegen onlaın nesıe orǵa jyǵyp, nesibesinen aıyrdy. Endi olaı bolmaıdy. Azamattardyń atyna alaıaqtyq jolmen rásimdelgen nesıe esepten shyǵarylady. QNRDA basshysy Madına Ábilqasymovanyń aıtýynsha, esepten shyǵarý tek sot sheshimimen júzege asyrylady.
– Qazir biz alaıaqtyq jolmen rásimdelgen nesıelerdi esepten shyǵarý máselesin qarastyryp jatyrmyz. Azamattar onlaın nesıe rásimdeýge «eGov» portaly arqyly tyıym sala alady. Búginde 700 myńǵa jýyq azamat erikti túrde onlaın nesıe rásimdeýge tyıym saldy. Osy tyıymǵa qaramastan, azamattardyń atyna nesıe rásimdelgen bolsa, sot sheshimimen mundaı nesıeler mindetti túrde esepten shyǵarylady. Alaıaqtar rásimdegen onlaın-nesıelerdi esepten shyǵarýǵa qatysty krıterıılerdi keńeıtip, azamattarymyzdyń quqyn qorǵaý máselesin pysyqtap jatyrmyz, – dedi agenttik tóraǵasy.
Bıyl maýsymnan bastap, bıometrııalyq derekter usynýǵa qatysty talaptar da kúsheıtilgen. Sonymen qatar onlaın nesıe berýge qatysty eki faktorly aýdentıfıkasııa júrgizilip júr. Alaıaqtardyń nesıe rásimdeýi sonda da toqtar emes. Sol sebepti agenttik alaıaqtar rásimdeıtin onlaın nesıelerge qatysty krıterıılerdi bekitip jatyr.