23 qazan - halyqaralyq qar barysy kúni. Bul kúni álem osynaý erekshe janýarǵa aıryqsha nazar aýdarady, dep jazady Egemen.kz.
Almaty oblysy ákimdiginiń málimetinshe, qar barysy, sondaı-aq ilbis retinde belgili mysyq tuqymdas janýar «Kólsaı kólderi» memlekettik ulttyq tabıǵı parkiniń aýmaǵynda ómir súredi.
Qar barystary 3000-4500 metr bıiktegi taýlarda mekendeıdi, olardyń popýlıasııasy on eki memlekettik qoryqta qorǵalady. 2014 jyly Kólsaı kólderinde kezdeskeni tirkelip, óńirdegi qar barystarynyń popýlıasııasyn zertteýde mańyzdy kezeń boldy.
2019 jyly qar barysyn zertteý jáne qorǵaý baǵytyndaǵy jumystar jańa serpin aldy: Zoologııa ınstıtýtynyń qyzmetkerleri men ulttyq parktiń ınspektorlary 40 beınekamera ornatqan, bul – osy jumbaq janýarlardyń minez-qulqyn tereńirek zertteýge múmkindik berdi. Búginde Kólsaı kólderiniń aýmaǵynda QR-nyń Qyzyl kitabyna engen 22 qar barysy tirkelgen.
Kólsaı kólderindegi qar barysynyń popýlıasııasyn saqtaý jáne zertteý jumystary jalǵasyp jatyr. Beınekameradan alynǵan málimetter ǵalymdarǵa qar barystarynyń ómir súrý salty, mekendeıtin oryndary, kóbeıý erekshelikteri týraly jaqsy túsinýge kómektesedi. Bul túrdiń joıylyp ketý qaýpiniń joǵary ekenin eskere otyryp, qar barysyn qorǵaý men zertteý bolashaqta da nazarda bolýy tıis.