Memleket basshysy Taıaý Shyǵystaǵy ahýaldyń ýshyǵýyna alańdaýshylyq bildirdi.
«Bizdiń oıymyzsha, qaqtyǵystyń kedeıshilik, teńsizdik pen bilimsizdik sııaqty túp sebepterin birlesip joıý halyqaralyq saıası yqpaldastyqty nyǵaıtýdyń negizgi faktory bolyp qala beredi. Qazaqstan BUU Qaýipsizdik Keńesin reformalaýdy jáne onyń quramyn Afrıka, Latyn Amerıkasy, Azııa elderiniń jańa músheleri esebinen keńeıtýdi qýattaıdy», dedi Prezıdent.
Qasym-Jomart Toqaev beıbitshilik jáne qaýipsizdik máselelerin sheshýde Jahandyq Ońtústik elderiniń úni salmaqty shyǵýǵa tıis dep málimdedi. Onyń aıtýynsha, BRIKS jahandyq basqarý qurylymynda orta derjavalar men damýshy ekonomıkalardyń úlesin arttyryp, bul úderiste negizgi ról atqara alady.
Memleket basshysy Qazaqstannyń BRIKS-ke múshe eldermen saýda-sattyq aınalymy qarqyndy ósip kele jatqanyn atap ótti. Bul kórsetkish byltyr elimizdiń syrtqy saýda kóleminiń jartysyna jetti. Qasym-Jomart Toqaevtyń pikirinshe, saýda jáne ınvestısııa, IT-tehnologııa, asa mańyzdy mıneraldar, azyq-túlik qaýipsizdigi, bilim jáne týrızm salalary ózara tıimdi seriktestiktiń perspektıvti baǵyttary sanalady.
Prezıdent óz sózinde kólik-tranzıt salasyndaǵy, eń aldymen, «Bir beldeý, bir jol», «Soltústik-Ońtústik» halyqaralyq kólik dálizi jáne Transkaspıı halyqaralyq kólik baǵyty bastamalary aıasyndaǵy ózara yqpaldastyqty nyǵaıtý máselesine basa mán berdi.
Qasym-Jomart Toqaev energetıkalyq qaýipsizdikti nyǵaıtý, sondaı-aq sý tapshylyǵy, aýa temperatýrasynyń kúrt kóterilýi jáne shóleıttený sekildi klımat ózgeristeriniń saldaryn eńserý úshin «BRIKS plıýs» aıasynda senimdi seriktestik qatynastar qalyptastyrý qajet ekenin atap ótti.
Prezıdent sózin qorytyndylaı kele, «BRIKS plıýs» formatyndaǵy birlesken áreketter Soltústik pen Ońtústik arasyndaǵy ózara baılanysty edáýir nyǵaıtyp, memleketter damýyndaǵy alshaqtyqty joıýǵa, halyqaralyq qaýipsizdikti aıtarlyqtaı kúsheıtýge jáne jahandyq progress úshin qolaıly jaǵdaı jasaýǵa múmkindik beretinin aıtty.
Sammıtke 36 eldiń ókilderi jáne 6 halyqaralyq uıymnyń jetekshileri qatysty, sondaı-aq joǵary deńgeıdegi 20-ǵa jýyq delegasııa kelgen.