Sońǵy jyldary Áýlıeata óńirinde áleýmettik nysandardyń qurylys jumystary qarqyndy júrgizilip jatyr. Birneshe jyldyń bederinde birqatar medısınalyq mekemeler, basqa da mańyzdy ǵımarattar óńir halqynyń ıgiligine paıdalanýǵa berildi. Bul úrdis mereıli mereke Respýblıka kúni qarsańynda da jalǵasty. Ásirese aýdan ortalyqtarynan shalǵaıda ornalasqan eldi meken turǵyndary merekeniń sharapatyn aıryqsha sezinip otyr.
Qordaıdaǵy qýanysh
Táýelsizdik alǵaly beri Jambyl óńiriniń jampozdary sapynan boksshylar Ermahan Ybyraıymov, Baqtııar Artaev, dzıýdoshy Eldos Smetovtiń Olımpıada oıyndarynda atoı salǵany barshaǵa belgili. Úsh sańlaq ta altyn besik aýylda týǵan saıypqyrandar ekenin muqym el jaqsy biledi. Aýylda týyp álemdi moıyndatqan oǵlandardyń izbasarlaryn daıyndaýda birinshi kezekte buqaralyq sportqa basymdyq berý kerek. О́ıtkeni bári de aýyl, aýla sportynan bastalady. Muny Memleket basshysy Qasym Jomart Toqaev «Ádiletti memleket. Birtutas el. Berekeli qoǵam» atty Joldaýynda da atap ótti.
«Barshańyzǵa málim, men buqaralyq sportty damytýǵa erekshe mán berip otyrmyn. Jastarymyz deni saý, myqty azamat bolyp ósýi kerek. Sondyqtan ult saýlyǵyn saqtaýda buqaralyq sporttyń mańyzy aıryqsha. Shyn máninde, bul saladaǵy zańnamany jańartatyn kez keldi dep oılaımyn. Zańǵa engiziletin ózgertýler buqaralyq sport pen balalar sportyn damytýǵa zor serpin beredi. Sondaı-aq bolashaq jeńimpazdar shoǵyryn daıarlaýǵa jol ashady», degen Memleket basshysynyń sózi buqaralyq sportty damytýdyń mańyzy zor ekenin aıǵaqtap tur.
Prezıdent tapsyrmasy Jambyl oblysynda da sátimen iske asyrylyp jatyr. О́ńirdegi halyq eń tyǵyz ornalasqan Qordaı aýdanynda mereke qarsańynda tórt sport nysany paıdalanýǵa berildi. Osylaısha, turǵyndardyń jergilikti atqarýshy bılikke jyldar boıy aıtyp kelgen ótinishi qanaǵattandyryldy.
Shalǵaıda ornalasqan Noǵaıbaı aýylynyń balalary alǵashqylardyń biri bolyp merekeniń sharapatyn sezinip otyr. Noǵaıbaılyq balalar endi zamanaýı standartqa saı salynǵan shaǵyn fýtbol alańynda jattyǵady. Sondaı-aq eldi meken turǵyndarynyń ıgiligine «Street workout» alańy da paıdalanýǵa berildi.
Qordaılyqtardyń qýanyshy munymen tolastaǵan joq. Aýdan ortalyǵy Qordaı aýylynyń shaǵyn aýdandarynda eki jańa shaǵyn fýtbol alańy ashyldy. Bul kúni jergilikti atqarýshy bıliktiń uıytqy bolýymen jas sportshylarǵa arnaıy sporttyq qural-jabdyqtar tabys etilip, shaǵyn fýtboldan joldastyq kezdesý uıymdastyryldy.
Oblys ákimdiginiń baspasóz qyzmeti keltirgen derekke júginsek, shaǵyn fýtbol alańdarynyń qurylysy jergilikti bıýdjet esebinen iske asqan. Jyl sońyna deıin taǵy 5 shaǵyn fýtbol alańynyń qurylysy tolyqtaı aıaqtalyp, paıdalanýǵa beriledi.
О́ńirde jyl sońyna deıin 12 sport kesheniniń qurylysyn aıaqtaý josparlanǵan bolsa, qazirgi kezge deıin 4 nysan el ıgiligine paıdalanýǵa berildi. Budan bólek, oblysta búgingi kúnge deıin 45 sport alańy ashylǵanyn aıta ketken jón.
Jalpy alǵanda óńirde ótken jyly buqaralyq sportpen qamtylǵan azamattardyń sany 40,2 paıyzdan asqan bolsa, osy jyly salaǵa jaýapty azamattar bul kórsetkishti 41 paıyzǵa jetkizýdi josparlap otyr. Kórsetkishti arttyrýǵa jańadan ashylǵan sport nysandary óz septigin tıgizetini anyq.
Qaıyńdyda FAP ashyldy
Prezıdent Joldaýynda bılik tarapynan medısına salasyn damytýǵa aıryqsha basymdyq beriletinin atap ótti. Memleket basshysy óz sózinde eldi mekenderde medısınalyq, feldsherlik-akýsherlik bólimsheler salýdyń kezek kúttirmes is ekenin de shegelep tapsyrdy.
«Búginde elimizdegi 650 eldi mekende emdeý mekemesi joq. Aldaǵy eki jylda bul aýyldarda medısınalyq, feldsherlik-akýsherlik bólimsheler salynyp, qajetti qural-jabdyqpen tolyq qamtamasyz etiledi. Osylaısha, memleket bir mıllıonnan astam adamnyń alǵashqy medısınalyq-sanıtarlyq kómek alýyna múmkindik jasaıdy», degen Prezıdent tapsyrmasyn jergilikti atqarýshy bılik der kezinde oryndap jatyr.
Turar Rysqulov aýdanyna qarasty Qaıyńdy aýyly – aýdan ortalyǵynan shalǵaıda ornalasqan. Aýdan ortalyǵynan jyraqta jatqan aýyl turǵyndary eldi mekenge feldsherlik-akýsherlik pýnkt kerektigin jyldar boıy aıtyp júretin. Jergilikti turǵyndardyń ótinishi nazardan tys qalmaǵany kóńil qýantady.
Sondaı-aq Qaıyńdy aýylynda jańa medısınalyq mekeme paıdalanýǵa berildi. Osylaısha turǵyndar ótinishi qaǵanattandyryldy. Jalpy quny 249,2 mln teńgege salynǵan jańa mekeme 15 kelýshige arnalǵan.
Jergilikti atqarýshy bılik keltirgen derekke júginsek, aýdanda buǵan deıin eki feldsherlik-akýsherlik pýnkt (FAP) salynǵan eken. Budan bólek, qazirgi ýaqytta Qoraǵaty stansasy men Aqbulaq eldi mekenderinde de dál osyndaı ǵımarattyń qurylys jumysy júrgizilip jatyr. Aýdannyń damý josparyna sáıkes, aldaǵy úsh jyldyń bederinde taǵy 5 medısınalyq mekeme salý josparlanǵan.
Jalpy alǵanda, oblystaǵy tozyǵy jetken densaýlyq saqtaý uıymdarynyń sanyn 40,3 paıyzdan 39 paıyzǵa tómendetý jóninde jergilikti atqarýshy bılik qoldan kelgenshe qamdanyp jatyr. Josparly jumysty ýaqtyly júzege asyrý maqsatynda 26 densaýlyq saqtaý nysanyn salý kózdelgen. Onyń ishinde 20 nysan «Aýyldyq densaýlyq saqtaýdy jańǵyrtý» jobasy aıasynda boı kóteredi. Al búgingi kúnge deıin úsh nysan el ıgiligine paıdalanýǵa berilgen.
Kóktaldyqtar kóp kútken klýb
О́ńirdiń mádenıet salasyn damytýǵa oblys ákimi Erbol Qarashókeevtiń ózi aıryqsha nazar aýdaryp otyr. Sońǵy ýaqytta óńir basshysynyń bastamasymen oblys aýmaǵynda birqatar jańa jobalar qolǵa alynyp jatyr. Ásirese óńir rýhanııatyn órkendetýge qatysty kóptegen ilkimdi ister atqarylyp keledi. Jańa bastamalardyń birqatary aýyldyq jerlerde uıymdastyrylyp jatqanyn eskersek, eldi mekenderge jasalatyn qamqorlyq tolastamaıtyny anyq ekenin túsine túsemiz.
Talaı talanttyń kindik qany tamǵan Talas aýdanyna qarasty Kóktal eldi mekeniniń turǵyndary da memlekettik merekeniń sharapatyn sezinip otyr. Iá, kóktaldyqtardyń bas aýrýyna aınalǵan aýyldyq klýb máselesi Respýblıka kúni merekesi aıasynda sheshimin tapty.
Jańa nysannyń ashylý saltanatyna arnaıy barǵan oblys ákiminiń orynbasary Serik Sálemov kóktaldyq turǵyndardy kópten kútken aıtýly qýanyshymen quttyqtap, aýyl halqynyń rýhanı suranysyn tolyq qanaǵattandyrý maqsatynda aýyldyq klýbta birqatar jumys atqarylatynyn tilge tıek etti.
«Aýylda mádenıet oshaǵynyń ashylýy – rýhanııatty órkendetýge jasalǵan naqty qadam. О́setin el eń aldymen mádenıeti men rýhanııatyna aıryqsha mán beretini barshamyzǵa málim. Mádenıeti joǵary ult qana álemdegi órkenıetti elderdiń qataryna qosylady. Memleket basshysy Qasym-Jomart Toqaev mádenıet pen ónerdi damytý memleketimizdiń negizgi basymdyqtarynyń biri ekenin udaıy aıtyp júr. Eldi mekenderde mádenıet úıleri men aýyldyq klýbtardyń ashylýy – Prezıdent tapsyrmasyn iske asyrýdyń naqty kórinisi. О́ńir mádenıetin jumylǵan judyryqtaı órkendete bereıik», dedi S.Sálemov.
Sońǵy birneshe jyldyń bederinde óńir mádenıetin órkendetýge qatysty aýqymdy jumys atqarylyp jatqanyn aıta ketken jón. Máselen, 2021 jyldan beri oblysta 18 mádenı nysannyń qurylys jumysy júrgizilip, der kezinde paıdalanýǵa berilgen. Al osy jyly 16 nysannyń qurylysy bastalǵan. Jyl sońyna deıin 8 nysan paıdalanýǵa beriledi dep josparlanǵan.
Jambyl oblysy