Burynǵylar «Asyq oınaǵan azar, dop oınaǵan tozar» deýshi edi. Qazir asyq atyp, abyroıǵa bólenip, dop qýalap, dúnıeni dopsha úıirip júrgender kóp. Sonyń bir aıqyn kýási – «Respublica» partııasy Merekege oraı «Qazaqstan» jeńil atletıka sport kesheninde asyq atýdan alǵash ret ashyq týrnır uıymdastyrdy. Týrnırdiń fınaldyq kezeńine 17 oblys, 3 megapolıstegi irikteý jarysynyń qorytyndysyna saı, 21 jastan asqan 2 myńǵa jýyq qatysýshynyń arasynan 1-2 oryn alǵan 40 sportshy ǵana joldama aldy.
Qazir elimizde 90 myńǵa jýyq oıynshy asyq atyp, ulttyq oıynymyzdy ulyqtap júr. 800-ge jýyq jattyqtyrýshy bar. Tóreshilerdiń de qatary artyp, kásibı biliktiligi kóterilip keledi. Saıystar da júıeli uıymdastyrylyp júr.
«Mundaı týrnır uıymdastyrýdy jarty jyl buryn qolǵa alyp, óńirlerde irikteý jarystaryn bastap kettik. Asyq atý kópshiliktiń oıynda aýyl balalarynyń kúndelikti oıyny retinde qalyp qoıǵan. Ony ulttyq, buqaralyq deńgeıge kóterý maqsatynda qomaqty júlde tigip, kópshilik qyzyǵýshylyǵyn arttyrsaq dep sheshtik. Irikteý kezeńderinde de júldegerler aqshalaı syıaqymen marapattaldy. Aldaǵy jyldary dástúrge aınaldyrsaq degen oıymyz bar. Tek 21 jastan asqandarǵa ǵana emes, jasóspirimder sanatyn da qosý josparda bar. Sebebi, jas býyndy qazirden úlken dodalarǵa daıyndaı berýimiz kerek. Jarys barysyna toqtalatyn bolsaq, básekelestik óte joǵary boldy. 4-5 jyl boıy el chempıony atanǵan, IV Dúnıejúzilik kóshpeliler oıynyna qatysqandardyń ózi jeńiliske ushyrady. Bári ádil bolsyn dep arnaıy kamera da qoıdyrdyq. Jańa esimderdi shyǵaryp, olarǵa múmkindik berý – asyq atý oıynynyń abyroıy», dedi «Kóshpelilerdiń asyq sporty» halyqaralyq federasııasynyń prezıdenti Oljas Quspekov.
Sporttyq is-sharanyń ashylý saltanatynda «Respublica» partııasy fraksııasynyń jetekshisi Aıdarbek Qojanazarov partııa atynan asyq atý federasııasynyń damýyna 5 mln teńge kóleminde qarjylaı kómek berilgenin, partııa músheleri asyq atý ǵana emes, toǵyzqumalaq ulttyq sportynyń damýyna úles qosyp jatqanyn jetkizdi.
Týrnır tartysqa toly boldy. Quralaıdy kózge atqan mergender sońǵy sátke deıin jeńiske umtyldy. Sondaı oıynnyń biri shırek fınalda Shymkent qalasynyń sportshysy, qyrǵyzdardyń ulttyq oıyny – «Ordo» oıynynan IV Dúnıejúzilik kóshpeliler oıynynyń kúmis júldegeri Ánýarbek Nurjigit pen Almaty qalasynyń úzdigi Taýbaı Jumabektiń arasynda boldy. Jeńimpaz tek qosymsha atys barysynda ǵana anyqtaldy. 4:5 esebimen jeńilýdiń aldynda turǵan Ánýarbek Nurjigit der kezinde jınaqtalyp, 6:5 esebimen basym tústi.
Ánýarbek Nurjigit alǵashqy oıynda «Alash saqasy» týrnıriniń kúmis júldegeri Ǵaryshbek Qulybekten 2:1 esebimen basym tússe, ekinshi jupta alǵashqy iri dodaǵa qatysyp jatqan Jetisý oblysynyń sportshysy Qastaı Manas sońǵy sátke deıin Nurlan Jomartqa (Pavlodar oblysy) qarsylyq kórsetti. Alma-kezek basymdyqpen ótken kezdesý 2:1 esebimen Nurlannyń paıdasyna sheshildi.
Úshinshi orynǵa talasta tájirıbeli Ǵaryshbek Qulybek Jetisý oblysynyń ókilin eki oıynda da merziminen buryn utyp, qola júldege ıe boldy. Al fınaldyq básekede Ánýarbek Nurjigit asyq atýdan IV Dúnıejúzilik kóshpeliler oıynynyń chempıony Nurlan Jomartqa eki oıynda da múmkindik qaldyrmady.
«О́te qýanyshtymyn. Týrnırdegi eń sheshýshi tus – shırek fınalda órbip, Almaty qalasynyń sportshysynan basym tústim. Sol jeńis jiger berdi. Fınalda baq synasqan Nurlan Jomartpen byltyr Shymkenttegi básekeniń sheshýshi oıyndarynda da jolymyz túıisip, jeńgen edim. Barsha qoldaǵan jaqyndaryma, bapkerime alǵysymdy aıtamyn», dedi ashyq týrnırdiń chempıony Ánýarbek Nurjigit.
Myńnan oza shapqan Ánýarbek Nurjigit JAC temir tulparyn tizgindese, kúmis júldeger Nurlan Jomart 1 000 000 teńge syıaqy aldy. Al qola júldeger Ǵaryshbek Qulybek 500 000 teńge syıaqyny ıelendi. Jeńiske degen jigeri úshin Jetisý oblysynyń ókili Qastaı Manasqa arnaıy kýbok tabys etildi.
Jalpy, Kóshpelilerdiń asyq sporty halyqaralyq federasııasy qurylǵan jarty jyldyń ishinde 14 elde turaqty asyq oınaý federasııasy tirkeldi. Asyq oınaý sporty kóshpeliler oıynynyń turaqty túri bolyp bekitildi. Nátıjesinde, bıyl ulttyq quramamyz Qyrǵyzstan komandasyn 2:1 esebimen jeńip, top jardy. Endi eki jylda bir ret álem chempıonaty ótkizilip turatyn boldy. Alǵashqysy bıyl elorda tórindegi «Aspan» sport kesheninde uıymdastyrylyp, oǵan 14 eldiń ókili qatysty.