Aspantaýdyń etegindegi Jambyl aýylynda jańa mádenıet úıi esigin aıqara ashty. Jalpy aýdany 657 sharshy metrlik mádenıet oshaǵynyń qurylysyna 392 mln teńge qarjy jumsaldy.
Eńseli de ádemi ǵımarat ishinde óner úıirmelerine arnalǵan keń de jaryq birneshe kabınet jasaqtalǵan. Zamanaýı basqarý stýdııasy, grım bólmeler, aıshyqty sahna, 180 oryndyq akt zaly, bir sózben, mádenıet úıiniń materıaldyq-tehnıkalyq bazasy tolyq jabdyqtalǵan. Alty aı qys bolatyn óńirdiń aýa raıy eskerilip, 12 tonnalyq suıyq otyn saqtaıtyn bóshkeler ornatylyp, sýyq, ystyq sý júıeleri iske qosylǵan.
Myńnan astam turǵyny bar Qaratoǵan aýyldyq okrýgi – týrızmniń qaınar kózi, kúrejoly. Qatarlasa qonys tikken Qaratoǵan men Jambyl aýyldarynyń ortańǵy kóshelerimen ataqty Aqkól, Shoǵansaı demalys oryndaryna jaz aılarynda kúnige júzdegen jolaýshy-týrıst aǵylyp ótedi. Tabıǵaty tamyljyp turǵan aýyl turǵyndarynyń týrızmdi damytýǵa degen ynta-yqylastary arta túsken. Sondaı-aq okrýg turǵyndary halyqtyq ónerdi áspettep, órisin keńeıtýge belsene aralasyp keledi. Bul aýyldarda dombyranyń qos isheginen kúı tógildirip, áýelete án salatyn ánshi-termeshiler, shejireshiler kóptep ósip kele jatqanyn Baqqoja Muqaı atyndaǵy aýdandyq mádenıet úıiniń dırektory Medet Baıjuma áserli áńgimeledi.
«Qaratoǵan men Jambyl aýyldarynda buryn-sońdy mádenıet úıi bolmaǵan. Soǵan qaramastan, mundaǵy turǵyndar men jas býyn ónerden shet qalǵan emes. Aýdandyq, oblystyq óner saıystaryna qatysyp, jeńimpaz atanǵandary jetip artylady. Daryndy jastardy mamandar mektepishilik úıirmelerge qatystyryp, ónerlerin ushtap kelgen edi. Endi mine, daryn ıeleriniń basy qosylyp, shyǵarmashylyqtaryn shyńdaýǵa qolaıly ǵımarattyń paıdalanýǵa berilýi – tyń jańalyq, zor qýanysh bolyp otyr», – deıdi Medet Serikuly.
Aspantaý eliniń mereıin tasytyp, qýanyshyn eselegen mereıli saltanatqa Raıymbek aýdanynyń ákimi Berik Dúısenbaev, óner maıtalmandary men aýyl turǵyndary qatysty. Merekelik kóńil kúı syılaǵan rýhanı shara aýdandyq «Aqtolqyn» halyqtyq-folklorlyq ansambliniń kóńil terbegen kúı-shashýymen bastaldy.
«Amanat» partııasynyń saılaýaldy baǵdarlamasy aıasynda elimizdiń árbir óńirinde, sonyń ishinde Raıymbek aýdanynda kóptegen áleýmettik nysandardyń qurylysy júrip jatyr. Aýdanymyz 2018 jyly óz aldyna jeke shańyraq kótergeli beri mádenıet salasynda kóptegen ózgerister boldy. Memlekettiń qoldaýymen aýdannyń ár túkpirinde jańa mádenıet ǵımarattary ashyldy. Bul nysan da aýylymyzdaǵy mádenı-rýhanı qundylyqtar júıesin jańa deńgeıge kóterýge múmkindik beretinine senim mol. Osy ıgi iske qatysqan qurylysshylarǵa, mádenıet salasynyń qyzmetkerlerine, aýylymyzdyń órkendeýine óz úlesin qosqan árbir azamatqa alǵysymdy bildiremin», – dedi aýdan ákimi B.Dúısenbaev quttyqtaý sózinde.
2019 jyly aýdandyq mádenıet úıine quny 25 mln teńge turatyn jyljymaly sahna satyp alyndy, 2021 jyly Qaqpaq aýylyndaǵy mádenıet úıi kúrdeli jóndeýden ótti. Al byltyrǵy jyly Súmde aýylyndaǵy mádenıet úıi paıdalanýǵa berildi.
«Ulttyq qundylyqtarymyz, onyń ishinde sport pen mádenıettiń arqasynda kók týymyz, elimiz ben jerimiz tórtkúl dúnıege tanylyp otyr. Jambyl – shaǵyn ǵana qut qonǵan aýyl. Bul jerde Berdibek Soqpaqbaev, Muqaǵalı Maqataev, Saǵathan Áshimbaev syndy aqyn-jazýshylar, qaıratkerler dúnıege kelgen. Aýyl turǵyndarynyń uıymshyldyǵynda shek joq. Mektebi jańardy, kóshesi asfalttalyp, jyldan-jylǵa kórkeıip keledi. Búgingi mádenıet úıiniń ashylýy jastardyń turaqtaýyna, eńbek etýine, ónerin óristetýge septigin tıgizeri sózsiz», – deıdi Qazaqstannyń eńbek sińirgen qaıratkeri, akter Baýyrjan Qaptaǵaev.
Mádenıet úıi ǵımaratynyń qurylys jumystaryn Sádýaqas Mútálıev basqaratyn «Almaty-Construction.BM» JShS sapaly júrgizip, ýaqytynda tapsyrdy.
Almaty oblysy