Buqar jyraý aýdany Úmitker aýylynyń áleýmettik kezekte turǵan adamdaryna páter kilti tabystaldy. Eki páterli úsh úıdi qurylys kompanııalary salyp bitirip, ony aýdandyq ákimdik satyp aldy. Páter kiltin tapsyrý saltanatyna Buqar jyraý aýdanynyń ákimi Erlan Qusaıyn qatysyp, muqtaj jandardy qýanyshtarymen quttyqtady.
– «Úıi bardyń – kúıi bar» deıdi dana halqymyz. Búgin jańa úılerdiń kiltin tabystap, úmitkerlikterdiń qýanyshyn eseledik. Bıyl «Samuryq-Qazyna» ulttyq ál-aýqat qorynyń qoldaýymen, respýblıkalyq bıýdjettiń kómegimen 40 páter satyp alýǵa qarajat bólindi. Úmitker aýylyndaǵy jańa páterlerge muqtaj bolyp otyrǵan alty otbasy ıe boldy. Bul – kópbalaly jáne turǵyn úıi apatty dep tanylǵan otbasylar. Turǵyn úımen qamtamasyz etý jónindegi jumystar kelesi jyly da qarqyndy túrde jalǵasyn tabady, – dedi Erlan Beısembaıuly.
Páterge ıe bolǵandar – kópbalaly analar Nursáýle Nurtazına, Aınur Ábilǵazına, múmkindigi shekteýli Seısenbek Shohshın, úıleri apatty jaǵdaıdaǵy Erlan Qazybekov, Vladımır Pýtıatın, jalǵyzbasty ana Aıtjan Aınasheva.
Igilikti is-shara barysynda aýyl aqsaqaly Qaıyr Ábilǵazın batasymen alqap, jańa baspanaǵa qol jetkizgender arasynan Erlan Qazybekovtiń jubaıy Juldyz memlekettiń kórsetip otyrǵan qamqorlyǵyna rızashylyǵyn bildirdi.
Qaraǵandy oblysy,
Buqar jyraý aýdany,
Úmitker aýyly