Tabıǵaty kórkem Tuıyq aýylyn myńnan astam halyq mekendeıdi. Qys aılarynda qar erekshe qalyń túsetin taýly óńirdiń negizgi tynys-tirshiligi – aýyl sharýashylyǵy. Jergilikti halyq kólemi 6 myń gektarǵa jýyqtaıtyn jerde mal baǵyp, shóp shaýyp, kartop egip, keıingi jyldary qozyquıryqty da tabys kózine aınaldyrǵan.
Eńbekqor eli bar eldi mekenniń yrys-quty ortaımaıdy. Turǵyndarǵa qyzmet kórsetetin áleýmettik nysandar da qalypty jumys isteıdi. Kósheler jaryqtanyp, joldarǵa asfalt tóselip, aýyldyń ajary kirgen. Shalǵaıda jatsa da, ınternet jelisi iske qosylyp, ár úıge aýyzsý tartylǵan. Kezinde Tekeli qorǵasyn-myrysh kombınatynyń Tuıyq rýdnıgi jumys istep, Tekelige qorǵasyn tasyǵan. 2020 jyldan beri rýdnıkti qaıta qalpyna keltirý jumystary qolǵa alynǵan.
Taý qoınaýynda jatqan Tuıyqtyń tamasha tabıǵatyna qumartatyndar kóp. Jaz shyǵa demalýshylar legi aǵylady. Sondyqtan bolashaqta týrızmdi damytý maqsatynda ınvestor tartý da – kezek kúttirmeıtin másele.
Bıyl Tuıyq aýylynyń ákimi Jeńisbek Álıasqarovtyń saıabaq ashý týraly usynysyna aýyl turǵyndary qoldaý bildirip, qurylys jumysy bastalǵan. Jańa nysan ýádeli merzimde aıaqtalyp, oǵan «Besqaraǵaı saıabaǵy» degen ataý berildi. Saıabaq aýyl jastarynyń serýen qurýyna, qonaqtar men qarııalardyń shúıirkelesip, nemerelerimen qydyrystaýyna múmkindik týǵyzdy. Jýyrda qazynaly qarttar men aq jaýlyqty analar aq bata berip, saıabaqtyń ashylý saltanatyn jasady. Oǵan Kegen aýdandyq máslıhatynyń tóraǵasy Almasbek Nókerbanuly qatysyp, aýyl jurtyn qýanyshpen quttyqtady.
Almaty oblysy