Bıyl – án ónerinde óshpes iz qaldyrǵan erek ónerpaz, Qazaqstannyń eńbek sińirgen ártisi Mádına Eralıevanyń týǵanyna 70 jyl. Osyǵan oraı A.Toqmaǵambetov atyndaǵy qalalyq mádenıet úıinde «Qazaqtyń Aqbaıany» atty oblystyq ánshiler baıqaýy uıymdastyryldy. Bulaq syńǵyryndaı ásem únimen tyńdaýshysyn baýraǵan ánshi rýhyna arnalǵan mádenı keshti Qaraózek aýyldyq klýby men Qyzyljarma aýyldyq mádenıet úıi birlese uıymdastyrypty.
Qyzylordadaǵy M.Mámetova atyndaǵy pedagogıkalyq ýchılısheniń stýdenti kezinen ónerimen tanylǵan talapty jastyń baǵyn ashqan týyndy – kompozıtor Beksultan Baıkenjeevtiń áıgili «Aqbaıan» áni boldy. Alǵashqy qatysqan baıqaýy – Almatyda ótken kórkemónerpazdar óner báıgesinde osy ánmen júldeli orynǵa ıe bolǵan ánshini kúlli jurt «Án áleminiń Aqbaıany» dep alaqanynda aıalady.
Pedýchılısheden keıin Qazaqtyń qyzdar pedagogıkalyq ınstıtýtynyń mýzyka fakýltetin bitirse de óner jolyna birden túse qoımaǵan kezinde qazaqtyń qabyrǵaly qaıratkeri О́zbekáli Jánibekov qamqorlyq tanytyp, oblystyq fılarmonııaǵa qabyldap, daryndy jasqa jol ashty. Jas ánshiniń repertýaryn da árkez qadaǵalap, baǵyt-baǵdar berip otyrǵan ult mádenıetin ulyqtaǵan qaıratkerdiń arqasynda Mádına esimi án kóginde erkin qalyqtady.
О́miriniń sońǵy jyldarynda taǵdyr tylsymyn boljaǵandaı «Esińe meni alǵaısyń», «Kúreń kúz» ánderin jıi oryndaǵan ánshi osydan 24 jyl buryn qarashanyń sýyq keshinde kúre joldyń boıynda kólik apatynan qapyda kóz jumdy. Sol sát kúlli jurt án aspanyndaǵy syńǵyr ún kenetten úzilip túskendeı kúı keshkeni ras.
Úlken ekrannan berilgen Mádına ánderinen bastalǵan baıqaýda qala ákiminiń orynbasary Darhan Tursynbaev artynda óshpes iz qaldyrǵan ánshiniń ult ónerindegi ornyna toqtalyp, baıqaý qatysýshylaryna sáttilik tiledi.
Kompozıtor, Qazaqstannyń eńbek sińirgen qaıratkeri Ramazan Taımanov, kompozıtor, Mádenıet salasynyń úzdigi Sábıt Ulyqpanuly, oblystyq halyq shyǵarmashylyǵyn damytý jáne mádenı-prodıýserlik ortalyǵynyń kórkemdik jetekshisi Rýslan Býrabaı qazylyq etken baıqaýda 20-35 jas aralyǵyndaǵy 8 ónerpaz baq synady.
Qatysýshylar eki kezeńnen turatyn baıqaýdyń alǵashqy satysynda Mádına Eralıeva repertýarynan bir án, ekinshi kezeńde óz múmkindigin kórsetetin taǵy bir týyndy oryndady. Syr sandýǵashynyń ónerin nasıhattap, jastar talabyn qoldaýǵa arnalǵan konkýrs qorytyndysy boıynsha júldeli III oryndy Jalaǵash aýdanynan Ornyqhan Pazyl, II oryndy jańaqorǵandyq Islamhan Naǵyzhan, birinshi oryndy qyzylordalyq Áıgerim Shúkirbaeva ıelendi.
Baıqaýdyń bas júldesin Syrdarııa aýdanynan kelgen Aıaýlym Bekbolatova jeńip aldy.
Qyzylorda