Taıaýda elimizdiń ulttyq merekesi – Respýblıka kúni keń kólemde atalyp ótti. Memlekettiligimizdiń irgetasyn qalaǵan ulyq kúnniń qurmetine Prezıdent atynan marapat alǵan azamattardyń arasynda bizdiń gazettiń burynǵy basshylary men qyzmetkerleri de bar. «Qazaq gazetteri» seriktestiginde ótken jıynda bas dırektor Dıhan Qamzabekuly olardyń esimderin qurmetpen atady.
– «Egemen Qazaqstan» gazetiniń burynǵy basshylary Nurlan Orazalın – «Otan» ordenin, Darhan Qydyráli «Barys» ordenin ıelendi. Gazetimizdiń ardageri, ádebıet synshysy Qulbek Ergóbek Abaı atyndaǵy Memlekettik syılyqtyń laýreaty boldy. Sonymen qatar gazettiń kezinde Mańǵystaý oblysynda menshikti tilshisi bolǵan Temirhan Medetbek «Halyq jazýshysy» atandy. Bul azamattardyń árqaısy bizdiń basylymnyń damýyna eleýli úles qosqan.
Ulttyq mereke qarsańynda «Qazaq gazetteri» seriktestigine qaraıtyn basylymdardyń qyzmetkerleri de nazardan tys qalmaı, birqatary joǵary marapat ıesi atanǵan edi. Bas dırektor jıyn barysynda ujym aldynda olarǵa marapattaryn tapsyryp, tósbelgilerin taǵyp, arnaıy quttyqtady. Atap aıtqanda, «Egemen Qazaqstan» gazetiniń Ulytaý oblysyndaǵy tilshisi Abdolla Dastan, Mańǵystaý oblysyndaǵy tilshisi Gúlaıym Dáýitbaı jáne Qyzylorda oblysyndaǵy tilshisi Murat Jetpisbaev «Eren eńbegi úshin» medalimen marapattaldy.
Al «Kazahstanskaıa pravda» gazetiniń tilshisi Iýlııa Polonskaıa «Shapaǵat» medalin, «Egemen Qazaqstan» gazetiniń fototilshisi Erlan Omar men «Kazahstanskaıa pravda» gazetiniń fototilshisi Iýrıı Bekker Prezıdenttiń Alǵyshatyn ıelendi.
Sonymen qatar meıram qarsańynda bir top áriptesimiz «Aqparat salasynyń úzdigi» atandy. Arnaıy tósbelgini keýdesine taqqandar qatarynda «Egemen Qazaqstan» gazetiniń aǵa tilshileri Gúlnar Joljan men Marjan Ábish, «Kazahstanskaıa pravda» gazetiniń Aqmola oblysyndaǵy tilshisi Raýshan О́teýlına jáne fototilshisi Igor Býrgandınov, kazpravda.kz saıtynyń tilshisi Gúlmıra Qunapııa bar. Buǵan qosa áriptesterimiz Aınur Raıymqulova men Beken Qaıratuly Mádenıet jáne aqparat mınıstrliginiń Qurmet gramotasymen, Baqytgúl Rahımbaeva Alǵyshatymen marapattaldy.
Jıyn barysynda D.Qamzabekuly seriktestikke qarasty basylymdarǵa kelesi jylǵa jazylý naýqany bastalǵanyn, osyǵan oraı oblystarda jazylymdy uıymdastyrýǵa kirisý qajettigin eske saldy. Menshikti tilshilerge oblystyq ákimdikpen, iri kásiporyndarmen, sondaı-aq oqý oryndarymen baılanys ornatyp, jumys júrgizýdi tapsyrdy. О́tken jyldan bastap kaspi.kz qosymshasy arqyly onlaın jazylý jolǵa qoıylǵany belgili. Seriktestik basshysy atalǵan qosymsha arqyly jazylý jeke tulǵalarǵa arnalǵanyn, baǵasy tıimdi ekenin atap ótti.