Qońyr kúzdiń kezekti kúnderinde Erkeǵalı Rahmadıev atyndaǵy memlekettik akademııalyq fılarmonııasynyń «Shalqyma» halyq bı ansambli «Altyn qor – bı qazynasy» atty konsertin usyndy. Mádenı kesh Qarýly kúshterdiń ulttyq áskerı patrıottyq ortalyǵynda ótti.
Atalǵan kesh ulttyq mádenıetimizdiń eń baı ári kórnekti qazynalaryn dáripteıtin mańyzdy mádenı is-shara boldy. Oǵan elimizdiń úzdik ártisteri men óner qaıratkerleri qatysyp, qazaq halqynyń bı jáne mýzyka óneriniń ozyq úlgilerin usyndy. Konsert kórermenderdi halqymyzdyń mádenı murasynyń altyn qoryna saıahat jasatyp, qazaqtyń bıi men kúıiniń erekshe úndestigin tanystyrdy. Ár shyǵarmada ulttyq bı dástúriniń keremet sheberligi men kompozıtorlardyń tól týyndylarynyń úılesimdiligi aıqyn kórinedi.
Kesh baǵdarlamasyna halqymyzdyń ataqty kompozıtorlarynyń shyǵarmalary men ulttyq bıleri engen. Qurmanǵazy, Súgir, Táttimbet, Nurǵısa Tilendıev, Kenjebek Kúmisbekov syndy uly tulǵalardyń kúıleri «Shalqyma» halyq bı ansambli men «Saryarqa» halyq mýzyka ansambliniń sheber oryndaýynda kórermen nazaryna usynyldy. Konserttegi bı nómirlerin qoıýshy sheberler – Qazaq KSR Halyq ártisi Shara Jıenqulova, Qazaqstannyń Halyq ártisi Zaýyrbek Raıbaev, Qazaqstannyń eńbek sińirgen ártisi Janat Baıdaralın, basqa da tanymal horeograftar. Olar ár shyǵarmanyń tereń fılosofııasyn, ulttyq bı óneriniń sulýlyǵy men úılesimin kórermenge jetkize alǵany anyq.
Atalǵan kesh qazaq mádenıetiniń baılyǵy men sulýlyǵyn dáriptep, halqymyzdyń rýhanı murasynyń mán-mańyzyn ashýǵa baǵyttalǵan. «Altyn qor – bı qazynasy» jobasy qazaqtyń bı jáne kúı ónerin bir sahnada úndestirý arqyly ulttyq murany zamanaýı kórermenderge jaqyn etip jetkizedi. Osylaısha, qazaq mádenıetiniń kópqyrly jáne baı murasyna degen qyzyǵýshylyqty arttyryp, óskeleń urpaqty ulttyq ónerge baýlýǵa múmkindik bergeni sózsiz.