Aqmola oblysynyń polıseıleri joǵalǵan áıeldi izdestirip jatyr, dep habarlaıdy Egemen.kz.
Oblystyq Polısııa departamentiniń málimetinshe, 31 qazan kúni saǵat 19:00 shamasynda Astrahan aýdanynyń 31 jastaǵy turǵyny úıden shyǵyp ketip, oralmaǵan.
Áıeldiń joǵalyp ketkeni jóninde týystary habar berip, onyń turǵan jerin anyqtaýǵa kómek surap, polısııa bólimine habarlasqan.
Odan keıin izdestirý sharalary uıymdastyrylyp, aýmaqtyq bólimsheler men kórshi oblystarǵa iz-túzsiz joǵalǵan adam týraly habar taratylǵan.
Áıeldiń belgileri: boıy – 158 santımetr, dene bitimi ortasha, shashy uzyn qara, qoı kóz. Ol ashyq djıns shalbar, qara kapıýshony bar qara kúrte jáne aq krossovka kıgen.
«Polısııa departamenti iz-túzsiz joǵalǵan Ekaterına Aleksandrovna Boıalskaıanyń qaıda bolýy múmkin ekeni týraly biletinder bolsa, dereý 102 nómirine habarlaýdy ótindi», delingen habarlamada.