Densaýlyq saqtaý mınıstrligi men Túrkııanyń «Orhun Medical» kompanııasy onkologııalyq aýrýlary bar pasıentter úshin emdeý men dıagnostıkanyń sapasy men qoljetimdiligin jaqsartýǵa baǵyttalǵan aýqymdy jobany iske asyrý týraly kelisimge qol qoıdy.
«Jabdyqtalǵan ortalyqtardyń ashylýy onkologııamen aýyratyn naýqastarǵa shetelge shyqpaı-aq, el ishinde álemdik standarttar deńgeıinde joǵary tıimdi dıagnostıka men qaýipsiz em alýǵa múmkindik beredi. Jańa tehnologııalardyń kómegimen obyrdy durys jáne ýaqtyly emdeý aýrýdyń anyqtalýyn jaqsartýǵa, ómir súrýdiń bes jyldyq shegi bar pasıentterdiń úlesin arttyrýǵa, onkologııalyq naýqastardyń ómir súrý sapasyn arttyrýǵa múmkindik beredi», dep atap ótti qol qoıý barysynda Densaýlyq saqtaý mınıstri Aqmaral Álnazarova.
Kelisim sheńberinde Almaty qalasynda PET/KT, BFEKT/KT úshin talap etiletin radıofarmpreparattardy óndirý úshin ǵımarat salý jáne arnaıy jabdyqpen - sıklotrondy keshenmen jaraqtandyrý kózdelgen.
Aqtaý, Aqtóbe, Qaraǵandy, Qyzylorda jáne О́skemen qalalarynda kompıýterlik tomografııamen (PET/KT) biriktirilgen pozıtrondyq-emıssııalyq tomografııanyń jańa ortalyqtary qurylatyn bolady.
Almaty qalasynda qaterli isikterdi dıagnostıkalaý men terapııanyń progressıvti keshendi ádisterin engizý úshin bir fotondyq-emıssııalyq tomografııamen jáne kompıýterlik tomografııamen ushtastyra otyryp radıoızotoptyq preparattar qoldanylatyn Teranostıka ortalyǵyn ashý josparlanyp jatyr.