Jyl saıyn bási bıik ónerpazdarymyz ultymyzdyń jumbaq janyn ónerimen óristetip, ózge elderge tanystyryp keledi.
AQSh-tyń Nıý-Iork qalasynda ótken «Kóshpeliler juldyzy» atty halyqaralyq kórmede otandasymyz, jas sýretshi Tomırıs Qarabaeva týyndylaryn, kórermen nazaryna usynyp, yqylasyna bólendi. Birshama ýaqyt buryn alpaýyt elge shaqyrtý alǵan talantty qyz ulttyq naqyshtaǵy sýretteri arqyly el mádenıetiniń mereıin asyryp otyr.
Jas sýretshiniń ustazy, Atyraý qalasynyń máslıhat depýtaty, Mádenıet qaıratkeri Kamıla Japalova súıinshi habardy qýana jetkizdi.
– Amerıkanyń Nıý-Iork qalasyndaǵy Manhetten tórinde ótip jatqan «kóshpeliler juldyzy» atty halyqaralyq kórmeniń ashylý saltanaty kóńil tolqytty. Muhıt asyp, arman qýǵan bizder uzaq joldy baǵyndyryp, qazaqtyń sýret ónerin AQSh tórine shyǵaryp otyrmyz. Oǵan sebep, jaqynda meniń talantty oqýshym, bolashaǵynan kóp úmit kúttiretin 12 jasar sýretshi Tomırıs Qarabaeva Nıý-Iork qalasynda ótetin kórmege qatysýǵa shaqyrtý alǵan bolatyn. Kýratory, ustazy retinde kórmege men de qatysyp, shákirtim ekeýmiz Amerıkada Alashtyń asyl murasy, ulttyq taqyrypta salynǵan sýretterimizben kórermendi tańǵaldyrdyq. Halyqaralyq kórmege Amerıkanyń ózinen, Reseıden, TMD elderinen ónerpazdar qatysty. Sol sýretshiler arasynda Tomırıs altyn medal utyp, aıdy aspanǵa shyǵardy. Qandaı keremet! «Ustazdan shákirt ozar» degen osy. Álemge qazaq ónerin pash etip, elge degen qurmetimiz júrekti jaryp barady, – dedi ol.
Sýretshi Kamıla Japalovanyń «BatiKKami» art-galereıasy jas sýretshilerdi daıarlap, túrli konkýrstar ótkizip keledi. Olardyń ishinde ózge de talanttar shoǵyry jeterlik.
Aıta keteıik, bolashaǵynan úlken úmit kúttiretin Tomırıs Qarabaeva birneshe respýblıkalyq saıystardyń júldegeri. Jas ónerpazdyń ulttyq kórmesi Maıamı qalasyna shaqyrtý alyp otyr.