О́SKEMEN. 16 maýsym. О́ńir basshysy Danıal Ahmetovtiń ókimimen Ermak Salımov Semeı qalasynyń ákimi bolyp taǵaıyndaldy. Qala aktıvine jańa ákimdi oblys ákimi tanystyrdy. Bul týraly egemen.kz habarlady.
«Biz shahardyń damýyna ózgeshe reń, tyń qarqyn berýimiz kerek. Bul baǵytta aýqymdy josparlarymyz bar. Ermak Bıdahmetulynyń jumys tájirıbesi mol, isker basshy. Sondyqtan, qala ákimdigi jańa basshymen birge turǵyndarǵa qolaıly jaǵdaı jasaıdy dep senemin», – dedi aımaq basshysy aktıv jıynynda.
Ermak Salımov 1957 jyly Shyǵys Qazaqstan oblysynyń Kúrshim aýdanynda týǵan. 1981 jyly Qazaq polıtehnıkalyq ınstıtýtyn taý-ken ınjeneri-marksheıder mamandyǵy boıynsha, 2001 jyly Qazaq memlekettik zań akademııasyn zańger mamandyǵy boıynsha támamdaǵan.
Eńbek jolyn Shyǵys Qazaqstan oblysy Glýbokoe aýdanyndaǵy Ertis polımetall kombınatynyń Berezovskıı kenishindegi shahtada jerasty taý-ken sheberi bolyp bastaǵan. 1994 jylǵa deıin Ertis polımetall kombınatynyń Ertis kenishi partııalyq bıýrosynyń hatshysy, ýchaske bastyǵy, bas ınjenerdiń orynbasary bolyp eńbek etti.
1994-2008 jyldary azdaǵan úzilispen Glýbokoe aýdany ákiminiń orynbasary boldy. Odan keıin Shyǵys Qazaqstan oblysy kásipkerlik jáne ónerkásip basqarmasynyń bastyǵy, Rıdder qalasynyń ákimi, Shyǵys Qazaqstan oblysy ákiminiń orynbasary qyzmetin atqardy. 2010 jyldyń shilde aıynan beri Zyrıan aýdanynyń ákimi qyzmetinde boldy.
Dýman Anash.
Derek, sýret: egemen.kz.