Qarqaraly aýdany Besoba aýyldyq okrýgine qarasty Qyzyltý aýlynda feldsherlik-akýsherlik pýnkt ashyldy. Jańa nysannyń qurylysy bıyl bastalǵan edi, jaqynda aıaqtalyp, paıdalanýǵa berildi.
Aýdan ortalyǵynan toqsan shaqyrym qashyqtyqta ornalasqan aýylda qazirgi ýaqytta eki júzdeı adam turady. Mundaǵy aýyl turǵyndaryna dál osyndaı medısınalyq nysan aýadaı qajet edi. Kópshiliktiń kókeıinde kópten júrgen másele oń sheshimin taýyp, barshany qýantty. Medısınalyq pýnktte dárigerge deıingi qaraý kabıneti, egý, tańý bólmeleri, medısına qyzmetkerlerine arnalǵan, akýsherlik kabınetter jumys isteıdi.
Nysannyń saltanatty ashylý rásimine aýdan ákimi Ádiljan Arǵynov, aýdandyq ortalyq aýrýhananyń dırektory Dáýren Seıtpanov, aýdandyq máslıhattyń depýtaty Birjan Saparov qatysyp, halyqqa qutty bolsyn aıtty. Aýyl aqsaqaly, tyl ardageri Tóleý Bulanbaev úlkender atynan ıgi lebizin bildirip, batasyn berdi.
FAP qurylysy «Aýylda densaýlyq saqtaýdy jańǵyrtý» ulttyq jobasynyń aıasynda atqaryldy. Osy joba negizinde Qarqaraly aýdanynda 2025 jylǵa deıin ashylady dep josparlanǵan 17 medısınalyq nysan kezegimen el ıgiligine berilip jatyr.
Qaraǵandy oblysy,
Qarqaraly aýdany,
Besoba aýyly