Ispanııadaǵy seldiń saldary aýyr tıdi. Búginde bul elde tosynnan kelgen apattan kóz jumǵan adam sany 200-den asty. 29 qazanda «Dana» daýyly soǵyp, orasan zardabyn tartqan Valensııa avtonomııalyq qaýymdastyǵynda qutqarý jumystary áli júrgizilip jatyr. Tabıǵı apattan eldiń shyǵys aımaǵy qatty zardap shekken. Elektr jaryǵy óship, joldar jabylyp, poıyz qozǵalysy toqtady. Ǵımarattar, kópirler qıraǵan. Qaıtys bolǵandar sany áli de ósýi múmkin.
Atalǵan eldiń qaıǵysyna ortaqtasyp, Memleket basshysy Qasym-Jomart Toqaev Ispanııa Koroline kóńil aıtý jedelhatyn joldaǵan edi. «Osyndaı aýyr sátte Sizge, jaqyndarynan aıyrylǵan otbasylarǵa Qazaqstan halqynyń jáne ózimniń atymnan kóńil aıtamyn. Zardap shekkenderdiń tezirek saýyǵyp ketýine tilektestik bildiremin», delingen Prezıdent jedelhatynda.
Mundaı joıqyn sý tasqyny elde keıingi 50 jylda bolmaǵan. Birinshi kúni-aq 95 adam qaza bolǵan. Laı aǵynynan Kastılıa-La-Mancha jáne Andalýsııa aımaqtarynyń da kósheleri ǵımarattar men kólikterdiń úıindilerine aınalǵan. Myńdaǵan adam evakýasııalandy. Áli de qutqarýshylar jete almaǵan aýmaqtar bar.
Izdeý-qutqarý jumystaryna áskerıler, avıasııa men drondar tartylǵan. Tosynnan kelip, eldi tosyrqatqan tasqynnan zardap shekkenderge psıhologter kómek kórsetip jatyr. Myńdaǵan volonter jedel áreket etip, turǵyndarǵa azyq-túlik, qajetti zattardy jetkizip, aýmaqtaǵy qoqysty tazalaýǵa kirisken. Keı turǵyndar, jergilikti saıasatkerler bılik tarapynan eskertý men jedel sharalardyń keshigip jasalǵanyn synǵa aldy. Valensııa aımaǵynyń úkimeti turǵyndardy sý tasqyny týraly alǵashqy habarlamany segiz saǵat ótken soń, eldiń meteorologııalyq qyzmeti aımaqtaǵy «óte qaýipti» degen eskertpeni jarııalaǵannan keıin 10 saǵattan soń SMS habarlama jibergenin moıyndady.
Eldiń Premer-mınıstri Pedro Sanchestiń habarlaýynsha, qazirge deıin tótenshe jaǵdaılar kúshteri 4 800-ge jýyq adamdy qutqaryp, 30 myńnan asa adamǵa kómek kórsetken. Sondaı-aq ol joǵalǵan adamdardy izdeýge kómektesý úshin Madrıdten, Ispanııanyń basqa bólikterinen 5 myńǵa jýyq sarbaz kelgenin, taǵy da 5 myń áskerı qyzmetker jóneltilýin kútip otyrǵanyn aıtty.
Valensııadaǵy eń iri saýda ortalyǵy, 5 700 kólik orny bar Bonaire-diń kólik turaǵyn 3 metrlik deńgeıde sý basqan. Soǵan qaramastan qutqarý toptary men órt sóndirýshiler kúsh biriktirip, jerasty garajdaryndaǵy sý men laıdy shyǵarýǵa aıanbaı eńbektenip jatyr.
Tabıǵı apattan qatty zardap shekken aýdandarda mektepter men negizgi qyzmet kórsetý oryndarynyń jumysy toqtady. Tolassyz nóser jaýynnan keıin Madrıd jáne Barselonamen temirjol qatynasy úzilgen. 31 qazannan bastap elde úsh kúndik aza tutý kúni jarııalanǵan.
Sarapshylar apatty kún raıynyń kúrt buzylýyn klımattyń ózgerýimen baılanystyryp otyr. Iаǵnı Jerorta teńizindegi temperatýranyń joǵarylaýynan býlaný deńgeıi artyp, jaýyn-shashyn mólsherine áser etkenin jetkizdi. Meteorologter bolashaqta mundaı apattar jıileýi múmkin deıdi. Ispanııa bıligi apattan zardap shekken aımaqtardy qalpyna keltirý úshin Eýroodaqtan qoldaý surady.
Al bizdiń Syrtqy ister mınıstrliginiń ókili Aıbek Smadııarovtyń málimdeýinshe, Ispanııada sý tasqynynan zardap shekkender men qaza tapqandar arasynda Qazaqstan azamattary joq.