Búgin elimizdiń shyǵysy men batysyndaǵy óńirlerde jas shekarashy sarbazdar qoldaryna alǵash ret qarý ustap, Otanyna adal qyzmet etýge saltanatty túrde ant berdi. Al osynaý mańyzdy sátti óz kózderimen kórip, kýá bolý úshin alystan olardyń ata-áje, áke-sheshe, týǵan-týystary men dostary keldi.
Sondaı sharalardyń biri, UQK Shekara qyzmeti Almaty oblysy boıynsha departamentine qarasty Qarasaı aýdany shekara basqarmasynyń Aqjardaǵy tehnıkalyq jáne kásibı-daıarlyq bóliminde ótti. Jas jaýynger synyn sátti eńsergen 500-den asa jas sarbazdy departament bastyǵy polkovnık Á.Kaıýpov, «Generaldar keńesi» respýblıkalyq qoǵamdyq birlestiginiń tóraǵasy otstavkadaǵy general-leıtenant B.Sársekov, Qazaqstan Respýblıkasy Mas-Restlıng (taıaq tartý) federasııasynyń vıse-prezıdenti T.Qanalıev, zapastaǵy polkovnık D.Mamyrhanov bastaǵan shekarashy ardagerler quttyqtady.
UQK Shekara qyzmetiniń áleýmettik jelidegi resmı saıty arqyly respýblıka jurtshylyǵy tikeleı efırden tamashalaǵan rásimniń joǵary deńgeıde ótkenin, ata-analardyń qýanyshty júzderinen baıqaýǵa bolady. Solardyń biri, 75 jastaǵy B.Dúıseǵalıeva tuńǵysh nemeresiniń mańyzdy qadamyna ortaqtasý úshin Batys Qazaqstan óńirinen kelipti.
«Búgin erekshe kún, jas sarbazdar ant qabyldap jatyr. Táýelsiz eldiń shekarasyn qorǵaıtyn da osy jastar. Aǵa býyn atynan aıtarym, ata-babalarymyzdan amanat bolyp qalǵan ulan-ǵaıyr jerimizdiń árbir súıemin kózdiń qarashyǵyndaı qorǵaý, halqymyzdyń keıingi urpaqqa artqan senimderin aqtaý osy ulandardyń qolynda», deıdi óziniń sanaly ǵumyryn elimizdiń qaýipsizdigine arnaǵan «Generaldar keńesi» respýblıkalyq qoǵamdyq birlestiginiń tóraǵasy Beksultan Sársekuly.
Aıtý kerek, búgin «Srochnık 2.0» baǵdarlamasyna qatysqan «Kúz-2023» shaqyrylymynyń eki sarbazy, qatardaǵy jaýyngerler A.Artyqjanov pen E.Tileýbekke departament bastyǵy polkovnık Álibek Kaıýpov sertıfıkat tapsyrdy. Bul sertıfıkattar qos shekarashynyń elimizdegi ózderi tańdaǵan joǵary oqý oryndarynda bilim alýǵa berilgen joldama. Sondaı-aq, búgingi shara kezindegi taǵy bir aıshyqty oqıǵa, jaqynda oqý ortalyǵynda ótken «Taıaq tartý» saıysynyń jeńimpazy atanǵan birneshe sarbazdy QR Mas-Restlıng (taıaq tartý) federasııasynyń vıse-prezıdenti T.Qanalıev maqtaý qaǵazy jáne medalmen marapattady.
Ári qaraı, shara shekara basqarmasynyń arnaıy maqsattaǵy utqyr is-qımyldar tobynyń jaýyngerlik urys qımyldaryna arnalǵan sahnalyq kórinisterine ulasty. Otanyn qorǵaý úshin ottan da, sýdan da taısalmaıtyn saıypqyrandardyń saptyq alańdaǵy ábjil qımyldary olardyń aldyńǵy shepte júrer aldaspan jasaq, ásker elıtasy ekenin pash etip turdy. Sondaı-aq, UQK Shekara qyzmeti Qyzmettik kınologııa basqarmasynyń kınologtary jurtshylyqtyń aldynda sheberlik dárisin kórsetti. Iesiniń árbir buıryǵyn qalt etkizbeı oryndaǵan shekarashy ıtterdiń óneri kópshilikti tánti etti.
Mine, jas azamattardyń ómirindegi mańyzdy sátterdiń birine aınalǵan ant qabyldaý rásiminen keıin sarbazdar ata-ana, týǵan-týystarymen qaýyshyp, máre-sáre boldy. «Shekarashy boldym, minekı» degen maqtanyshty júzderinen «jasyra» almaǵan bolashaq el qorǵandary da osynaý sátti qalaı asyǵa tosty, deseńizshi?!
Tamara DÁÝLETBAEVA,
UQK Shekara qyzmetiniń zapastaǵy podpolkovnıgi