Senattyń Konstıtýsııalyq zańnama, sot júıesi jáne quqyq qorǵaý organdary komıtetiniń depýtattary keńeıtilgen jıyn ótkizdi. Onda sot júıesin jáne is júrgizý zańnamasyn jetildirýge qatysty zań talqylandy, dep jazady Egemen.kz.
Parlament depýtattary bastamashy bolǵan zań sotta qorǵalý quqyǵyn júzege asyrýdyń quqyqtyq kepildikterin kúsheıtýge, ádil sot júrgizý sapasyn arttyrýǵa, sýdıalardyń biliktiligi men jaýapkershiligin kúsheıtýge baǵyttalǵan. Zań Qylmystyq-prosestik, Azamattyq prosestik, Ákimshilik rásimdik-prosestik kodeksterge jáne basqa da zańdarǵa ózgeris engizýdi kózdeıdi.
Qujatta azamattyq jáne qylmystyq is jónindegi isterdi kassasııalyq ınstansııada aldyn ala qaraýdy alyp tastaý usynylyp otyr. Kassasııalyq ınstansııada isti aldyn ala qaraý alyp tastalǵan jaǵdaıda qylmystyq jáne azamattyq isterdi kassasııalyq ınstansııada qaraý merzimi qaıta qaralyp, ákimshilik isterge uqsas, biraq alty aıdan aspaıtyn ýaqytqa belgilenedi.
Zańda 3 kodeks pen 6 zańdy qosa alǵanda, 9 zańnamalyq aktige ózgerister men tolyqtyrýlar engizý usynylǵan.
Depýtattar keńeıtilgen otyrys qorytyndysy boıynsha zańdy Palataǵa qaraýǵa jiberý týraly sheshim qabyldady.
Aıta keteıik, kassasııalyq ınstansııa sotyna oblys jáne Joǵarǵy sot alqalary jatady. Olar sot tergeýin júrgizbesten tek is qaǵazdary men qosymsha dálelder jınaý arqyly tómengi sottyń áli zańdy kúshine enbegen sheshiminiń nemese úkiminiń zańdylyǵyn tekseredi.