Abaı oblysyndaǵy 9-synyp oqýshysy Jeńis Bojaev kún energııasyn paıdalanýdyń tıimdiligin arttyratyn ınnovasııalyq joba jasady.
Zerdeli jetkinshektiń jobasy kómirge, otynǵa jáne elektr energııasyna táýeldilikti azaıtyp, ekologııaǵa zııandy áserdi tómendetedi. Bul úshin ol aldymen kún kollektorynyń syzbasyn ázirlep, bólshekterden qondyrǵyny qurastyrýdan bastaǵan.
«Kollektordy qurastyrý kezinde aǵash karkas pen penopleks jylý ızolıasııasyn qoldandym. Osylaısha, júıeniń qos qabatty shyny arqyly germetıkalyq tyǵyzdyǵyn qalyptastyrdym. Jylý akkýmýlıatory retinde arnaıy ydysty qoldana otyryp, tıimdiligin synaqtan ótkizdim. 0,33 m² kólemindegi kollektor qurylǵysy 30°C temperatýraǵa deıin qyzý berip, kúni boıy 2 142 000 Dj energııa jınaı alatynyn kórsetti. Jobany iske asyrý arqyly týǵan jerimniń ekologııasyn jaqsartýǵa úlesimdi qosqym keledi», deıdi jas ónertapqysh.
Oqýshynyń aıtýynsha, kún kollektory arqyly turmystyq ǵımarattardy jylytý men aýyl sharýashylyǵyna qajet sýdy qamtamasyz etýge bolady. Aýyl sharýashylyǵy úshin 30–90°C aralyǵyndaǵy sý qajet ekenin eskergen ol bul júıeniń aımaq jaǵdaıyn jaqsartýǵa septigin tıgizetinine senimdi.
Qazir atalǵan qurylǵy synaqtan ótti. Onyń esepteýinshe, 23 m² aýmaqty qamtıtyn kún kollektory arqyly ortasha úı ishin jylytyp, ystyq sýmen qamtýǵa bolady. Bir jaǵynan, mundaı qurylǵyny úıdiń tóbesine ornalastyrý óte tıimdi.