Parlament Senatynyń tóraǵasy, Qazaqstan bochcha federasııasynyń Prezıdenti Máýlen Áshimbaev Bochchadan el kýbogi jolyndaǵy jarystyń jabylý rásimine qatysty. Saıys 3-6 qarasha kúnderi ótti. Oǵan elimizdiń 14 óńirinen 86 parasportshy qatysty.
M.Áshimbaev sportshylarǵa iltıpat bildirip, jyl ótken saıyn bochchadan ótetin jarystarǵa daıyndyq deńgeıi, oǵan qatysatyn qatysýshylar qatary jáne qoldaý kórsetetin jankúıerler sany artyp kele jatqanyn atap ótti. Memleket basshysy ınklıýzıvti qoǵam qurý, sapaly bilim men sporttyń barshaǵa birdeı qoljetimdi bolýyn qamtamasyz etý máselelerine Ádiletti Qazaqstannyń ajyramas bólshegi retinde basa mán berip otyr.
«Prezıdentimiz Qasym-Jomart Toqaev Ádiletti Qazaqstan qurý jáne teń múmkindikter qoǵamyn qalyptastyrý basty mindet ekenin únemi aıtyp keledi. Osy rette bochchany damytý ınklıýzııa mádenıetin qalyptastyrýdyń, qoǵamda yntymaqtastyq, birlik, ózara kómek sııaqty qundylyqtardy ornyqtyrýdyń ozyq úlgisi ekeni sózsiz. Qazirgi tańda elimizde bochchanyń qarqyndy damyp, balalar men eresekterdiń osy sport túrine degen qyzyǵýshylyǵy artyp kele jatqanyn kórip otyrmyz. Keıingi jyldyń ózinde bochcha úıirmelerine kelýshiler qatary 20 paıyzǵa kóbeıdi. Atalǵan sporttyń aýqymy da árdaıym keńeıip keledi. Bul joly jarysqa 14 óńirden kelgen sportshylar qatysty. Aldaǵy ýaqytta osyndaı saıystarǵa elimizdiń barlyq óńirinen sportshylar keledi dep senemin», dedi M.Áshimbaev.
Sonymen qatar ol búginde federasııa tarapynan bochchany odan ári damytý úshin barlyq baǵytta júıeli jumys júrgizilip kele jatqanyn tilge tıek etti. Bul rette óńirlerde fılıal ashý, jattyqtyrýshylardyń biliktiligin arttyrý sııaqty isterdiń mańyzy zor. Bekitilgen erejelerge sáıkes 19 jattyqtyrýshy men 3 tóreshi attestattaýdan ótkizildi. Osyndaı irgeli jumys arqyly sportshylar halyqaralyq jarystarda da joǵary nátıjeler kórsetip júr.
«Parıjde ótken Paralımpıada oıyndarynda otandyq sportshylar mańyzdy jetistikterge qol jetkizdi. Kelesi oıyndarda bochchadan Qazaqstan quramasy da joldama alady dep senemiz. Federasııa osy maqsatqa jetý úshin bar kúsh-jigerin jumsaıdy. Sizder ózderińizdiń qajyr-qaırattaryńyzben ózgelerge úlgi bolyp, barshamyzdy qanattandyryp, múmkin emes nárse joq ekenin dáleldep kelesizder», – dep M.Áshimbaev jarystyń ótýine atsalysqan eriktiler – Dene shynyqtyrý jáne buqaralyq sport akademııasynyń stýdentterine, sondaı-aq úles qosqan barsha azamatqa alǵys bildirdi.
Bochchadan Qazaqstan Kýbogi jolyndaǵy saıystyń nátıjesinde eresekter men jasóspirimder arasynda tórt dáreje boıynsha jeńimpazdar anyqtalyp, marapattaldy. Jalpykomandalyq esepte Astana qalasynyń komandasy jeńiske jetti. Ekinshi oryn Almaty qalasynan kelgen ujymǵa buıyrsa, úzdik úshtikti Pavlodar oblysynyń sportshylary túıindedi.