Elorda ákimdigi qolaısyz aýa raıynyń bastalýyna baılanysty qalada atqarylyp jatqan jumystar týraly baıandady, - dep habarlaıdy Egemen.kz.
Elordada kommýnaldyq qyzmetter kúsheıtilgen rejımde jumys istep jatyr, dep habarlaıdy elorda ákimdiginiń resmı saıty.
«7 qarashada tańerteń qala kóshelerin qardan tazartýǵa 2000-nan asa jol jumysshysy men 750-ge jýyq arnaıy tehnıka shyqty. Birinshi kezekte ortalyq kóshelerde, jolaýshylar kóligi marshrýttarynda, aıaldamalar men trotýarlarda tazalaý jumystary júrgizilip jatyr», delingen habarlamada.
Qalada birneshe jabdyqtalǵan qar polıgondary bar. Onda samosval tehnıkasynyń nómirlik belgileri oqý júıesimen jabdyqtalǵan, beınebaqylaý kameralary ornatylǵan, jaryqtandyrý qosylǵan.
Elorda ákimdigi turǵyndar men qala qonaqtarynan joldarda abaı bolýdy, qaýipsizdik erejelerin saqtaýdy, daýyldy eskertý bolǵan jaǵdaıda alys saparlardan bas tartýdy suraıdy. Tótenshe jaǵdaı týyndaǵan kezde «112» telefon nómirine habarlasý qajet.