ASTANA. 30 sáýir. Nepal astanasy Katmandýdan úsh saǵattyq jolda ornalasqan aýyl turǵyndary jer silkinisinen zardap shekkender úshin gýmanıtarlyq kómek alyp bara jatqan júk kólikterdiń jolyn bógep tastady. Bul týraly reuters.com habarlady.
«Úkimet bizge tamaq bermeı jatyr. Kúrish tıelgen júk kólikteri janymyzdan ótýde. Barlyǵyn ortalyq aýdandarǵa ǵana tasyp jatyr», – dedi narazylyq bildirýshilerdiń biri Ýdhav Gırı.
29 sáýir kúni Katmandýda 200 adam parlament ǵımaratynyń mańyna jınalyp, úkimetten zilzaladan zardap shekkenderge kómek kórsetýin talap etti.
Birikken Ulttar Uıymynyń aqpary boıynsha, apat aımaǵynda azyq-túlik pen aýyz sýdyń tapshylyǵy baıqalady, ondaǵan myń adam baspanasyz qalǵan.
25 sáýirde oryn alǵan joıqyn jer silkinisinen qaza bolǵandar sany 5 myńnan asty. Alaıda, Nepal premer-mınıstri Sýshıl Koırala apat qurbandarynyń qorytyndy sany 10 myńǵa jýyqtap qalý múmkindigin joqqa shyǵarmady.
Zilzala aımaǵynda qırandylardy jınastyrý jumystary jalǵasýda. Nepalǵa apat saldaryn joıýǵa Japonııa men Reseı kómektesip jatyr. Sondaı-aq AQSh, Izraıl, Fransııa, Ulybrıtanııa, Shveısarııa, Polsha men Birikken Arab Ámirlikteri de ózderiniń kómekke daıyn ekenderin jetkizdi.
Aıdar О́risbaev.
Derek, sýret: reuters.com.