Polıseılerge Honda Accord kóliginiń ıesinen aryz túsken. Turǵynnyń aıtýynsha, ol bir aı buryn kópqabatty úıdiń aýlasyna jaramsyz kóligin tastap ketken. Osy ýaqyt ishinde kólikti belgisiz bireý urlap ketken, dep habarlaıdy Egemen.kz Polisia.kz-ke silteme jasap.
Kólik ıesi kólikti bir aı buryn tastap ketkenin, keıin onyń joǵalǵanyn anyqtap, shyǵyndy 500 myń teńgege baǵalaǵanyn málimdegen.
Anyqtalǵandaı, ury 38 jastaǵy azamat bolyp shyqqan. Ol kólikti ıesiz dep oılap, jaǵdaıdy paıdalanyp, evakýator shaqyrǵan. Evakýator júrgizýshisin kóliktiń ózine tıesili ekenine sendirip, kólikti úıine deıin jetkizip alǵan.
Kúdikti ustalyp, óz kinásin moıyndap, polıseılerge kólikti biraz ýaqyt ańdyǵanyn túsindirgen.
Kólik zańdy ıesine qaıtarylyp, urlyq faktisi boıynsha qylmystyq is qozǵalǵany habarlandy.