Qostanaıdaǵy Ybyraı Altynsarın mýzeıinde jazýshy, etnograf-ǵalym, satıra sardary Seıit Kenjeahmetulynyń 85 jyldyǵyna arnalǵan «San ónerdiń sarbazy» atty kórme ashyldy.
Kórmege qalamgerdiń ǵylymı-tanymdyq, etnografııalyq eńbekteri, óleń jınaqtary, satıralyq murasy, fotosýretteri, kózi tirisinde paıdalanǵan turmystyq buıymdary qoıylǵan.
Kórmeniń ashylý rásimine mádenıet salasynyń qyzmetkerleri, óńir zııalylary, stýdentter men oqýshylar, jazýshynyń týystary qatysty. Is-shara barysynda aqyn Serikbaı Ospanov, Jazýshylar odaǵynyń oblystyq ókili Januzaq Aıazbekuly syndy Seıit Kenjeahmetulynyń kózin kórgen kisiler qalamgerdiń ómiri men shyǵarmashylyǵy týraly taǵylymdy áńgime aıtty. Stýdentter jazýshynyń satıralyq shyǵarmalaryn oqydy.
«Bul is-shara Ybyraı Altynsarınniń memorıaldyq mýzeıinde ótip jatqany kezdeısoq emes. О́ıtkeni uly aǵartýshy men Seıit Kenjeahmetulynyń arasynda rýhanı sabaqtastyq bar. Seıit aǵamyz qazaq ádebıeti men mádenıetine ólsheýsiz eńbek sińirdi. Qalamger Ybyraı jaıynda zertteý maqalalar, kóptegen eńbek jazdy. О́kinishke qaraı, Ybyraı Altynsarın ensıklopedııasyn aıaqtaı almaı ketti. Ol kisi qazaq halqynyń rýhanı baılyǵyn, salt-dástúrin, ádet-ǵurpyn, mádenıeti men ónerin, turmysy men tirshiligin tereń taldap, jerine jetkize zerttep jazyp shyqty. «Qazaq halqynyń salt-dástúri», «Jeti qazyna», «Ulttyq ádet-ǵuryptyń bizge beımálim 220 túri» dep atalatyn ǵylymı-tanymdyq, etnografııalyq eńbekteri jurttyń qolyna túspeıtin qymbat qazynaǵa aınaldy, mektep oqýshylarynyń ulttyq-tanymdyq oqýlyqtarynyń qataryna qosyldy. Qazaq, orys, aǵylshyn tilderinde jaryq kórgen «Qazaq halqynyń salt-dástúrleri», «Qazaqtyń darqan dastarqany», «Qazaqstan halqynyń turmysy men mádenıeti» atty kólemdi eńbekteri álemniń 37 eline tarady. Seıit Kenjeahmetulynyń ulttyq salt-sana, dástúrimizdi dáriptep, el jadyn jańǵyrtyp, jandandyrýǵa qosqan eseli eńbegin halqymyz eshqashan umytpaq emes», deıdi oblystyq mádenıet basqarmasy basshysynyń orynbasary Mels Beıbituly.
Qostanaı oblysy