«Amanat» partııasy oblystyq fılıalynyń «Kitap-Amanat» ortalyǵynda belgili jýrnalıst Baıtursyn Ilııastyń 85 jyldyǵyna arnalǵan taǵylymdy kesh ótti. L.Tolstoı atyndaǵy oblystyq kitaphana men partııa fılıaly uıymdastyrǵan is-sharaǵa qalamgerdiń týys-týǵandary, óńir zııalylary, memlekettik qyzmetshiler, stýdentter qatysty.
Eske alý keshinde qarymdy jýrnalıstiń «Egemen Qazaqstan» gazetiniń óńirdegi menshikti tilshisi bola júrip, Ahmet Baıtursynulynyń muralaryn zerttep, nasıhattaýǵa zor úles qosqany jóninde de áńgime órbidi. 1996 jyly Baıtursyn Ilııas «Aq jol» ǵylymı-tanymdyq ekspedısııasyn uıymdastyryp, oǵan basshylyq etti. Ekspedısııa Alash ardaqtysy Ahmet Baıtursynulynyń júrip ótken izimen Torǵaı óńirin aralap, el ishindegi kónekóz qarııalardyń aýzynan kóptegen qundy derek-maǵlumattardy jınady. Ǵylymı sapardan soń qalamger Ahańnyń ómiri men qaıratkerligi týraly «Altyn besik» atty zertteý eńbegin jazdy.
Kesh barysynda kezinde «Aq jol» ǵylymı-tanymdyq ekspedısııasynyń basy-qasynda bolǵan Ibrahım Aǵytaıuly sóz alyp, Baıtursyn Ilııastyń azamattyq bolmysy men jýrnalıstik sheberligi jaıynda oı tolǵady.
«Aldymen bir ótinish aıta keteıin, kitaphana qyzmetkerleri, stýdent jastar birlesip kitap taldaý degendi uıymdastyrý kerek. Ahmetti jazyp júrgenderdiń birazy jaqshanyń ishindegi «úlken izdenispen» estigen-bilgenderin qaıtalap, kórkemdep jazyp júr. Al eń birinshi Ahmetti tanytýshylardyń biri – osy Baıtursyn Ilııas. Bir kúni ol qońyraý shalyp: «Osyndaı ekspedısııa uıymdastyryp jatyr edim. Maǵan jolbasshy bolýǵa qalaısyń?» dedi. Men: «Jolbasshy emes, atshy bolamyn. Men sizdiń bul saparyńyzǵa benzın, toqtap, qonatyn oryn jaǵyn qamdap, kezdesetin adamdaryńyzben kezdestiremin», dedim. Sonymen atshy bolyp bardym. Baıtursyn aǵamyzdyń keremeti – ýaq-túıek nárseniń barlyǵyn túrtip jazyp otyrady eken. О́te yjdaǵatty. Ol saparda tapqan eń basty oljamyz – Ahmetti kórgen eki torǵaılyq aqsaqalmen kezdestik. Birinshisi – Mirjaqyptyń nemere balasy esepti Baıeke Jumabaev. 1919 jyly Ahmet atamyz ben Bádrısapa ájemiz sol Jumabaıdyń úıinde bolǵan. Bákeń osy kisiden kóptegen qundy materıaldar jazyp aldy», dedi Ibrahım Aǵytaıuly.
Baıtursyn Ilııas artynda «Tyń túlekteri», «Toǵyz perne», «Patsha kóńil» atty tamasha jyr jınaqtaryn qaldyrdy. Kesh barysynda qalamgerdiń poezııasy týraly aıtylyp, oblystyq kitaphananyń qyzmetkeri Botagóz Dúısenbaeva kópshilikke aqynnyń týǵan jer taqyrybyndaǵy óleńderin jatqa oqyp berdi.
Qostanaı oblysy