Qazaq poezııasy alyp muhıt desek, sol muhıtqa óziniń názik te syrshyl arnasyn qosqan aqynnyń biri – Aqushtap Baqtygereeva. Akademık Zeınolla Qabdolov «Oral desem, meniń esime úsh qyz túsedi, biri – Qyz Jibek, ekinshisi – Mánshúk, al úshinshi – Aqushtap Baqtygereeva» degen eken. Búginde mereıli 80 jastyń seńgirine shyǵyp otyrǵan aqynnyń esimi – ádebıet esigin ashqan ár talantqa tanys, oqyrman qulaǵy tosańsymaı qabyldaıtyn biregeı esim.
Astanada Qazaqstannyń eńbek sińirgen qaıratkeri, Memlekettik syılyqtyń laýreaty, «Qurmet», «Otan» ordenderiniń ıegeri Aqushtap Baqtygereevanyń mereıtoıyna oraı Q.Qýanyshbaev atyndaǵy Memlekettik akademııalyq qazaq mýzykalyq-drama teatrynda «Juban» dramasy sahnalandy. Elordalyq kórermendermen birge qoıylymdy Senat tóraǵasy Máýlen Áshimbaev, Májilis tóraǵasy Erlan Qoshanov, Mádenıet jáne aqparat mınıstri Aıda Balaeva tamashalady.
Is-sharada Aıda Balaeva kópshilikke Prezıdent Qasym-Jomart Toqaevtyń quttyqtaý hatyn oqyp berdi.
«Halqymyz ózińizdi mádenıetimiz ben ónerimizdi órkendetýge úles qosyp kele jatqan qarymdy qalamger, kórnekti qoǵam qaıratkeri retinde jaqsy biledi jáne qurmetteıdi. Eńbek jolynda birqatar otandyq gazet-jýrnaldar men baspada jemisti jumys istep, ulttyq ádebıetimizdiń ilgeri basýyna kúsh-qaıratyńyzdy jumsadyńyz. Qazaq poezııasyna ózindik órnegińizben kelip, aıshyqty oılar men aıryqsha dara shýmaqtaryńyzben tanyldyńyz. Elimizdiń mártebesin asqaqtatqan Táýelsizdik pen beıbit ómirdi jáne tabıǵat sulýlyǵyn arqaý etken jalyndy jyrlaryńyzdy talǵamy bıik oqyrman jyly qabyl aldy. Sonymen qatar otbasy qundylyqtary, qyz balanyń tárbıesi, ananyń qoǵamdaǵy róli týraly paıymdy pikirlerińiz qoldaý taýyp keledi. Aldaǵy ýaqytta el-jurttyń ortasynda syı-qurmetke bólenip, shyǵarmashylyq izdenisterińiz tabysty bola berýine tilektespin. Sizge myqty densaýlyq jáne otbasyńyzǵa baq-bereke tileımin!» delingen quttyqtaý hatta.
О́z sózinde mınıstr kórnekti aqyndy mereıjasymen quttyqtaı otyryp, jastardyń boıyna rýhanı qundylyqtardy sińirýge, otanshyldyqty qalyptastyrýǵa zor úles qosqanyn atap ótti.
– Prezıdent atap ótkendeı, qazaq ádebıetinde Aqushtap Baqtygereevanyń ózindik órnegi, orny bólek. Sebebi aqyn apamyzdyń óleńderi ár qazaqtyń júregine jaqyn. Onyń poezııasy erekshe syrshyldyqpen, sezimtaldyqpen órilgen. Qalamgerdiń qazaq áıeliniń beınesin asqaqtatqan biregeı týyndylaryn erekshe atap ótkim keledi. El anasy, ult tárbıesiniń janashyry retinde qundylyqtarymyzdy qasterleýge, qazaq qyzdaryna parasat pen tárbıe nárin sińirýge zor úles qosyp keledi, – dedi A.Balaeva.
«Juban» poetıkalyq dramasyn Batys Qazaqstan oblystyq Hadısha Bókeeva atyndaǵy qazaq drama teatry Aqushtap Baqtygereeva men dramatýrg Mádına Omarovanyń ssenarııimen ázirledi. Qoıylymda ult taǵdyry talqyǵa túsken qıly kezeńderde «Men qazaqpyn!» dep jar salǵan atpal aqynnyń ǵumyr joly kórinis tapqan.
Aqyn mereıtoıy budan ári jalǵasyn taýyp, Ulttyq akademııalyq kitaphanada J.Moldaǵalıev atyndaǵy Batys Qazaqstan oblystyq ortalyq ámbebap ǵylymı kitaphanasynyń uıymdastyrýymen «Alashtyń Aqushtaby» taqyrybynda ádebı kezdesý ótti. Is-sharaǵa astanalyq aqyn-jazýshylar jáne zııaly qaýym ókilderi men oqyrmandar qatysty. Kesh júrgizýshisi aqyn Dáýletkereı Kápuly Aqushtap Baqtygereevanyń ómiri men shyǵarmashylyǵyna toqtalyp, paıymdy pikir bildirdi. Aqyn Ǵalym Jaılybaı, jazýshy Altynshash Jaǵanova, synshy Amangeldi Keńshilik, t.b qurmetti qonaqtar «Jaıyqtyń aq shaǵalasy» atanǵan aqynnyń poezııadaǵy orny týrasynda qadaý-qadaý pikir bildirdi. Kesh barysynda «Meniń Farızam» kitabynyń tusaýy kesilip, kópshilik oqyrmanǵa taratyldy. Aqynnyń bul kitabynda qazaq poezııasynyń padıshasy Farıza Ońǵarsynovanyń ómir joly týraly syrlar, oı-tolǵamdar qamtylǵan.
Ádebı keshter legi munymen toqtamaı, Eýrazııa ulttyq ýnıversıtetinde «Káýsar» mádenı-tanymdyq birlestiginiń uıymdastyrýymen aqynnyń jastarmen kezdesýi ótti. Keshte stýdent jastar aqynmen dıdarǵaıyp bolyp, eldik rýhtaǵy óleńderine qulaq túrdi. Stýdentter aqynnyń óleńderin mánerlep oqyp, sózine jazylǵan ánderdi oryndady.
– Jastar qaıda bara jatyr eken, meniń balapandarym, meniń nemerelerim ne oılaıdy eken, sony kórgim kelgen edi. Poezııaǵa qarlyǵash qustaı bolyp kelip edim, qazir 80-ge kelip, úlken qalam ıesi dep qabyldap jatqan elimniń qurmetine bólenip otyrmyn. Osyndaı egemen eldiń qyzy bolǵanym úshin taǵdyryma rızashylyǵymdy bildiremin, – dedi aqyn óz sózinde.