Almaty oblysy Eńbekshiqazaq aýdanynyń Tóle bı aýlyndaǵy «Qyran» dástúrli ańshylyq ortalyǵynda «Sonar-2024» halyqaralyq qusbegiler týrnıri uıymdastyryldy. Týrnırdiń negizgi maqsaty – qusbegilik ónerin dáripteý, sheteldik qatysýshylar arasynda tájirıbe almasý.
Týrnırge elimizdiń 13 oblysynan kelgen 80-nen astam qusbegi, 67 búrkit, 16 qarshyǵa, 14 ıtelgi qatysty. Mońǵolııa, Qytaı, Qyrǵyzstannan kelgen sheteldik qusbegiler de óz ónerlerin kórsetti. Jalpy, qatysýshylar sany júzden asty, olardyń arasynda álemdik, halyqaralyq deńgeıdegi jarystardyń jeńimpazdary men tájirıbeli qusbegiler de boldy.
Týrnırdiń ashylý saltanatynda Eńbekshiqazaq aýdanynyń ákimi Talǵat Baıedilov sóz sóılep, qusbegilik óneri qazaq halqynyń mádenıetiniń mańyzdy bóligi ekendigin atap ótti.
«Bul jarys – qazaq halqynyń ǵasyrlar boıy jalǵasqan dástúrin, ulttyq mádenıetimizdiń bir bólshegi bolyp tabylatyn qusbegilikti dáripteıtin mańyzdy shara. Qusbegilik – tek sport emes, ata-babalarymyzdan qalǵan uly mura, tabıǵatpen, ańshylyq ónermen baılanysymyzdy kórsetetin erekshe óner», dedi aýdan ákimi.
Týrnırde negizinen búrkitpen, qarshyǵamen, ıtelgimen ań aýlaý atalymdary sarapqa salyndy. Árbir qusbegi óz qusymen ańshylyq ónerin kórsetip, ulttyq sport túriniń úzdik ókili atanýǵa tyrysty.
«Qusbegilik – úlken óner, ony saqtap, ári qaraı damytý bárimizdiń ortaq mindetimiz», degen Qusbegilik federasııasynyń vıse-prezıdenti Baǵdat Múptekeqyzy týrnır qatysýshylaryna sáttilik tiledi. Saıys aıaqtalǵannan keıin Almaty oblysy ákiminiń orynbasary Bolat Kúreńbekov jeńimpazdardy marapattady.
Sonymen Qytaı, Mońǵolııa, Qyrǵyzstan memleketterinen, elimizdiń 13 oblysynan qusbegiler qatysqan «Sonar-2024» halyqaralyq týrnırdiń jarys nátıjesinde búrkit baptaǵan Astana qalasynan qatysýshy Erasyl Serikbekuly Aqbas búrkitimen, Jetisý oblysynyń qusbegisi Jasulan Búrkitbaı Aqbórte, Abaı oblysynyń namysyn qorǵaǵan Rınat Álimǵazın Qaradaýyl qyranymen jeńimpaz atandy.
Itelgi ushyrǵan qaraǵandylyq Tanat Ospanqulov pen Pavlodar oblysynan qatysqan Ermek Imanǵazıev jeńimpazdar tuǵyryna kóterilse, «qarshyǵa» atalymynda Almaty oblysynyń qusbegileri Beksultan Seıitjan men Saǵynysh Baetbaı, Jambyl oblysynyń qyrany Qanjar ıesi Berikbolsyn Babajan úzdikter qatarynan kórindi. Jarystyń jeńimpazdary men júldegerleri dıplom, medal, kýbok, aqshalaı syılyqtarmen marapattaldy. Jalpy júlde qory 3 mıllıon teńgeni qurady.
Sonymen qatar elimizdiń eńbek sińirgen ártisi, ánshi Nurlan О́nerbaev ta jeńimpazdardy marapattap, qazaq halqynyń qusbegilik dástúriniń bolashaq urpaqqa jetýinde osyndaı sharalardyń mańyzdylyǵyn atap ótti.
Týrnırdi uıymdastyrýǵa Mádenıet jáne sport mınıstrligi, Almaty oblysy ákimdigi, Almaty oblysynyń dene shynyqtyrý jáne sport basqarmasy, «Qusbegilik» respýblıkalyq federasııasy, «Samuryq-Qazyna» ulttyq ál-aýqat qory qoldaý kórsetti.
Almaty oblysy