Prezıdent Qasym-Jomart Toqaev sıfrlandyrýdy el ekonomıkasy damýynyń negizgi tetikteriniń biri retinde aıtyp keledi. Bul qoǵamnyń barlyq salasyna keńinen dendep enýge tıis. Budan áskerı sala da tys emes.
Prezıdent janyndaǵy Ortalyq kommýnıkasııalar qyzmetinde Qorǵanys mınıstriniń sıfrlandyrý jónindegi orynbasary Darhan Ahmedıevtiń qatysýymen ótken brıfıngte áskerı saladaǵy sıfrlyq transformasııa máselesi talqylandy. Spıker qoǵam men buqaralyq aqparat quraldarynyń ókilderin armııany sıfrlandyrý úderisteri, aıaqtalǵan jobalar, ázirlenip jatqan jáne engizilý satysynda turǵan baǵdarlamalar týraly habardar etti.
Onyń aıtýynsha, qarýly kúshterdiń qaýipsizdik júıesine jasandy ıntellektpen jabdyqtalǵan beıne saraptaý júıesi engizilmek. Ol áskerı nysan aýmaǵyna zańsyz kirýge tyrysatyn bógde adamdardy anyqtaýǵa, adamnyń kelbetin, avtokólik nómirlerin tanýǵa, adamdardyń jınalýyn jáne úı-jaılardan shyqqan tútindi de anyqtaýǵa qabiletti. Buǵan qosa bul júıe kameralardyń isten shyqqanyn da anyqtaıdy, basqarýshylyq jáne taǵy basqa sheshimder qabyldaý úshin derekterdi taldaıdy, áskerı qyzmettiń qaýipsizdigin arttyrady. Qazir atalǵan júıe Áýe qorǵanysy kúshteriniń áskerı bólimderinde qanatqaqty joba retinde testileýden ótip jatyr. Synaqtan keıin beıne saraptaý júıesi Qarýly kúshterdiń barlyq áskerı bólimine engiziledi.
Eń mańyzdy jobalardyń biri – áskerı mindettilerdiń tirshilik sıkliniń barlyq úderisin avtomattandyrýǵa múmkindik beretin «Sıfrlyq áskerı komıssarıat».
– Qorǵanys mınıstrligi basqa memlekettik organdarmen birlese otyryp, sıfrlyq transformasııa boıynsha aýqymdy jumys atqardy. Ol birtindep ómirdiń barlyq salasyna engizilip keledi jáne ýaqyt óte kele jumystar barynsha aıqyn ári naqty bola túsedi. Qazirdiń ózinde, mysaly, jergilikti áskerı basqarý organdarynda keıinge qaldyrý nemese esepke qoıý, esepten shyǵarý sııaqty qyzmetter áskerı komıssarıatqa azamattyń óziniń barýynsyz sheshiledi. Bul qyzmetterdiń barlyǵyn E-gov-taǵy azamattyń jeke kabınetinen alýǵa bolady. 2024 jyly 29 648 azamat áskerge shaqyrýdy avtomatty túrde keıinge qaldyrdy, – dep atap ótti D.Ahmedıev.
Sıfrlyq transformasııa áskerı bilim berý júıesine de áser etti. Barlyq áskerı oqý ornyn biriktiretin kópfýnksıonaldy bilim berý platformasy quryldy. Bul júıe eńbek fýnksııalaryn oryndaıtyn jeke modýlderdi qamtıdy. Oǵan joǵary oqý oryndary aralyq elektrondy kitaphana, oqý úderisin josparlaý qujattary, elektrondy jýrnaldar jáne sıfrlyq bilim berý resýrstary kiredi.
Mınıstrdiń orynbasary qyzmettik qujat aınalymy edáýir qysqarǵany týraly da aıtty. Qorǵanys mınıstrliginde «Áskerı qyzmetshiniń kabıneti» servısi iske qosylǵan. Onda barlyq baıanatty, anyqtamalardy jáne basqa da qyzmettik qujattardy birneshe mınýt ishinde berýge jáne alýǵa bolady.
Buǵan qosa qyzmettik turǵyn úıge kezekke qoıý, Qarýly kúshterdiń áskerı qyzmetshileri men azamattyq personalynyń turǵyn úı-jaıdy jaldaý shartyn jasasý jáne uzartý memlekettik qyzmetteri elektrondyq formatqa aýystyryldy. Endi bul qyzmetter E-gov jáne e-Gov mobile qosymshalary arqyly kórsetiledi.