Prezıdent Q.Toqaevtyń 2022 jyly 1 qyrkúıekte jarııalaǵan «Ádiletti memleket. Birtutas ult. Berekeli qoǵam» atty Joldaýyna sáıkes el Úkimeti sol jylǵy 30 qarashada bilim berý salasynda «Jaıly mektep» salý qanatqaqty ulttyq jobasyn arnaıy qaýlymen bekitken edi. Jobany iske asyrýdyń qarjylyq mindeti «Samruk-Kazyna Construction» AQ belgilengen. Al ulttyq jobany júzege asyrýdy jaýapty ortalyq, jergilikti atqarýshy organdar qamtamasyz etetin boldy. «Jaıly mektepterdiń» eń basty ereksheligi – munda bastaýysh jáne joǵary synyp oqýshylary bólek bloktarda oqytylady. Bul qaýipsizdik sharalaryn qamtamasyz etýge tikeleı baılanysty.
Kúni keshe ǵana Petropavl qalasynyń «Orman» shaǵyn aýdanynda 600 oqýshyǵa arnalǵan oblystaǵy alǵashqy jaıly mektep ashyldy. Jańa nysannyń ashylý saltanatyna oblys ákimi Ǵaýez Nurmuhambetov, qalanyń zııaly qaýym ókilderi, aqsaqaldar men ardager ustazdar qatysty. Quttyqtaý sózinde oblys ákimi «Jaıly mektep» ulttyq jobasy Memleket basshysynyń tikeleı tapsyrmasy boıynsha júzege asyp otyrǵanyn jetkizdi.
«Bizdiń balalar jańa, jaıly barlyq zamanaýı standartqa saı mektepte bilim alýǵa tıis. Sebebi ol jarqyn bolashaǵymyzǵa salynǵan ınvestısııa. Jetkinshekterge barlyq jaǵdaı jasalsa, aramyzdan álemdi baǵyndyratyn talaı ónertapqyshtar, ǵalymdar, óner ıeleri shyǵatynyna senimim mol. Biz órenderge jaqsy jaǵdaı jasap qana qoımaı, 80-ge jýyq adamdy jumyspen qamtyp otyrmyz. Osyndaı mektep «Bereke» shaǵyn aýdanynda da salynyp jatyr», dedi óńir basshysy.
Atalǵan bilim ordasynda «Orman» shaǵyn aýdanymen irgeles «Borkı», «Solnechnyı», «Iýbıleınyı» jáne jańadan ashylǵan «Birlik» shaǵyn aýdanynyń balalary oqıdy. Bilim uıasynda 30-dan astam synyp bólmesi, solardyń ishinde qazaq, orys, aǵylshyn tilderi, fızıka, hımııa, ınformatıka, bıologııaǵa arnalǵan arnaıy kabınetter, STEM zerthana jáne robottehnıka men ınteraktıvti taqtalar bar. Oǵan qosa eki sportzal, zamanaýı sheberhanalar, májilis zaly, bı zaly jáne kópsalaly sport alańy jumys isteıdi. Qyzdardyń sheberhana kabınetinde is tigetin zamanaýı tigin mashınalary qoıylǵan. Onda qyz balalar 18 túrli tigin ónerin úırenedi. Ashana men kitaphana da kórgen adamnyń kózin súrindirgendeı. Erekshe bilimdi qajet etetin balalarǵa da qolaıly jaǵdaı jasalǵan. Olarǵa arnalǵan ınklıýzııa jáne logoped kabıneti jumys isteıdi. Munda oqýshylar qazaq jáne orys tilinde bilim alady.
Anel Sabyr degen 8-synyp oqýshysy jańa mekteptiń ashylǵanyna aıryqsha qýanyshty ekenin aıtty. «Bul mektepte bári – ádemi. О́zim basketbolmen aınalysamyn. Sondyqtan sportzal erekshe unady», dese, Sábden esimdi ata-ana «Jaıly mektep» barlyq talapqa saı salynǵanyn aıtty. «Shynynda da, balalarǵa óte jaıly. Buryn oqyǵan mektepte ekinshi aıaqkıim aýystyratyn oryn óte tar bolyp, ata-analar balalarymen birge qysylyp-qymtyrylyp jatatyn edi. Al myna jańa mektepte ondaı joq. Ishi keń, oryn mol. Adam erkin tynystaıdy. Osy bilim ordasyna nemeremdi ákeldim», dep rızashylyǵyn bildirdi.
Jańa mektepke basshy bolyp, tájirıbeli maman, buryn mektep dırektory bolǵan Gúljan Jaqanova taǵaıyndaldy. «Bul bilim ordasy №28 mektep atalady. Kerek dúnıeniń bárin jetkizip aldyq. Erekshe bilimdi qajet etetin balalarǵa sý jańa, zamanaýı saýyqtyrý quraldaryn ákeldik. Arnaıy jıhazdar da bar. Balalardyń damýyna yńǵaıly taktıldi jol-kórpesheler, lıft, májilis zalynyń sahnasyna shyǵaratyn pandýstar – bár-bári qarastyrylǵan. Ázirge balalarymyz tolyq emes, biraq ýaqyt óte kele oqýshylar sany artady dep oılaımyn. «Birlik» shaǵyn aýdanynyń balalary da osynda kelip oqıdy. Mamandarymyz da áli de tolyǵatynyna senimdimin», dedi ol.
El Úkimeti balalardyń jarqyn bolashaǵy úshin barlyq jaǵdaıdy jasap otyr, endi tek jetkinshekter onyń baǵasyn bilip, Otanynyń ozyq oıly azamattary bolsyn deńiz.
PETROPAVL