Almaty oblysynyń ákimi Marat Sultanǵazıev kásipkerlermen kezdesip, shaǵyn jáne orta bıznesti damytýdyń ózekti máseleleri, sondaı-aq óńirdegi ınvestısııalyq ahýaldy jaqsartýǵa baǵyttalǵan baǵdarlamalar tóńireginde pikirlesti.
Ashyq dıalog formatynda ótken kezdesýde kásipkerler ákimge suraqtaryn qoıyp, pikir almasty. «Dana» jeke bilim berý mektebi» JShS quryltaıshysy Kúlánda Batyrbekova bıometrııalyq júıeni engizý máselesin kóterip, aqparattyq semınarlar ótkizý jáne jańa balabaqshalar salýǵa jer telimderin berýge qoldaý kórsetýdi surady. «Zııatker» JShS januıalyq ortalyǵynyń dırektory Ásel Jilkibaeva jastar sportyn damytýǵa baǵyttalǵan «Artsport» jobasyn qoldaýǵa qatysty saýalyn qoıdy. Ol qosymsha qarjylandyrý, qural-jabdyqtardy jańartý jáne respýblıkalyq olımpıadalarǵa qatysý rásimderin jeńildetý qajettigin atap ótti.
Talǵar aýdanyndaǵy «TehStroı» kompanııasynyń dırektory Áset Talǵatbek saýda alańdaryn jańǵyrtý kezinde sanıtarlyq normalardy saqtaý qajettigin alǵa tartty. Jıynda otandyq taýar óndirýshilerdiń «Jaıly mektep» ulttyq jobasyna qatysý máselesi de kóterildi. Kásipker Lıan Leonıdovıch otandyq taýar óndirýshilerdiń tenderge qatysý múmkindigi joq ekenin aıtty. Ákim kásipkerlikte ádil básekelestik orta qalyptastyrýǵa qajetti sharalardy qabyldaýǵa ýáde berdi.
«Shaǵyn kásipkerlikti qoldaýǵa 4 mlrd teńge, paıyzdyq mólsherlemelerdi sýbsıdııalaýǵa 2,5 mlrd teńge bólindi. 1,1 mlrd teńge – nesıe men lızıngke kepildik berý, 220 mln teńge – jas jáne áleýmettik kásipkerlerge arnalǵan memlekettik granttar. «Damý» qory 617 jobaǵa 83,6 mlrd teńge sýbsıdııa berip, 10,2 mlrd teńgeniń 322 jobasyna kepildik usyndy. Qarashada 40 kásipker memlekettik grant alady (ár jobaǵa 5 mln teńgege deıin). Almaty oblysy kásipkerler palatasynda óńirde kásipkerlikti damytýǵa qolaıly jaǵdaı jasaýǵa kómektesetin 8 salalyq keńes jumys isteıdi. Olardyń qyzmeti kólik jáne logıstıka, densaýlyq saqtaý, saýda jáne qyzmet kórsetý, aýyl sharýashylyǵy, týrızm, ónerkásip jáne jer qoınaýyn paıdalaný, adam kapıtalyn damytý, qurylys jáne turǵyn úı-kommýnaldyq sharýashylyq salalaryna baǵyttalǵan. Kásipkerler palatasy kásipkerlerdiń problemalyq máselelerin sheshý boıynsha belsendi jumys júrgizip jatyr», dedi oblys basshysy.
Almaty oblysy