Eýropalyq qaıta qurý jáne damý banki (EQQDB) elimizdegi ınfraqurylym jobalaryn júzege asyrýǵa 2 mıllıard eýrodan astam qarajat bólýdi josparlap otyr. Bul týraly EQQDB ókilderiniń Qazaqstanǵa eki kúndik sapary barysynda belgili boldy.
Bank basshysy Odıl Reno-Basso Qazaqstan Prezıdenti Qasym-Jomart Toqaevpen kezdesýinde el Úkimetiniń Qazaqstandaǵy ınvestısııalyq ahýaldy jaqsartý, 2029 jylǵa qaraı IJО́-ni eki esege arttyrý maqsatynda ekonomıkalyq reformalardy jedeldetý jónindegi bastamalary jóninde oń pikir bildirdi. Reno-Basso hanym sondaı-aq Sheteldik ınvestorlar keńesiniń 36-plenarlyq otyrysyna qatysty.
EQQDB aldaǵy 5 jylda elimizdiń energetıka jáne kommýnaldyq sektoryn jańǵyrtý jónindegi ulttyq jobasyna keminde 2 mıllıard eýro ınvestısııalaýǵa daıyn.
EQQDB prezıdenti jańartylatyn energııa kózderin biriktirý úshin ulttyq jeli ınfraqurylymyna odan ári ınvestısııa quıýdyń mańyzdylyǵyn atap ótti jáne banktiń «Batys aımaqty qosý» jobasyn júzege asyrý úshin Qazaqstan elektr jelilerin basqarý kompanııasymen (KEGOC) jumys istep jatqanyn jetkizdi.
Bank «Samuryq-Qazyna» AQ satyp alý erejesine, onyń «KEGOC» AQ jobasyna qoldanýǵa múmkindik beretin ashyqtyǵyna oń baǵa berdi. EQQDB strategııalyq ınvestısııalyq jobalardy iske asyrý, qordyń taýarlar men qyzmetterdi satyp alý tájirıbesin banktiń tıisti erejesimen, osy saladaǵy ozyq álemdik tájirıbemen odan ári úılestirý úshin «Samuryq-Qazyna» kompanııalar tobymen tyǵyz jumys isteýdi jalǵastyrmaq.