Sý resýrstary jáne ırrıgasııa mınıstrligi ázirlegen jańa Sý kodeksi – Úkimet, mınıstrlik, ózge de memlekettik jáne jergilikti atqarýshy organdardyń, jergilikti ýákiletti organdardyń quzyretterin muqııat retteıdi. Bul – sý resýrstaryn basqarý isin úılestirýdi jaqsartýǵa yqpal etedi, dep habarlaıdy Egemen.kz.
Mınıstrliktiń baspasóz qyzmetiniń málim etýinshe, negizgi jańashyldyqtardyń biri – sý nysandarynyń jaı-japsary týraly derekterdiń monıtorıngin jáne esepke alynýyn qamtamasyz etetin Sý resýrstarynyń ulttyq aqparattyq júıesiniń qurylǵany bolyp otyr. Atalǵan júıe sýdy paıdalanýdy baqylaý jáne sheshim qabyldaý úshin qajetti aqparatqa qol jetkizýge múmkindik beredi.
Sonymen qatar sý resýrstaryn qorǵaý men paıdalanýdyń bas josparyn jáne basseındik josparyn jasaý talaby paıda boldy, bul – ár aımaqtyń erekshelikterin eskerýge múmkindik beredi. Bas jospardyń qorytyndylary men usynymdary memlekettik josparlaý kezinde eskeriletin bolady. Bul sý sharýashylyǵy basseınderi deńgeıinde resýrstardy neǵurlym utymdy bólýdi qamtamasyz etýge arnalǵan halyqaralyq standart.
Jańa Sý kodeksinde sý obektilerin qorǵaý normalary da engizildi. Atap aıtqanda, shaǵyn sý qoımalary, sýly-batpaqty jerler, muzdyqtar qarastyrylǵan. Alǵash ret ekojúıeler men bıoártúrlilikti saqtaý úshin mańyzdy bolyp tabylatyn shaǵyn sý obektilerin qorǵaý is-sharalary egjeı-tegjeıli sıpattalǵan. Sonymen birge «ekologııalyq aǵyn» uǵymy engiziledi, bul – sý obektileriniń ekojúıelerin saqtaý úshin sýdyń eń tómengi ruqsat etilgen deńgeıi, sarqylýdan jáne basqa da jaǵymsyz saldardan qorǵaıdy.
Sý kodeksiniń jańartylǵan jobasy eldi mekenderdegi sýmen jabdyqtaý, sý burý jáne gıdrotehnıkalyq qurylystardyń qaýipsizdigine erekshe nazar aýdarady. Aýyl sharýashylyǵy men ónerkásip úshin sýdy paıdalanýdyń qatań normalaryn belgileıdi. Sondaı-aq qujat sý obektilerin qorǵaý jónindegi is-sharalardy edáýir keńeıtedi jáne sýdy paıdalanýdy retteýdi jetildiredi.
«Jańa Sý kodeksi jobasynyń negizgi maqsaty − ekonomıkanyń turaqty damýyn qamtamasyz etý, azamattardyń ómir súrý sapasyn jaqsartý, qorshaǵan ortany saqtaýǵa múmkindik beretin sýdy paıdalanýdyń qaýipsiz deńgeıine qol jetkizý jáne ony qoldaý bolyp tabylady. Qujat – klımattyń ózgerýine beıimdelýge jáne sýdy únemdeý prınsıpterin engizýge basa nazar aýdarady. Alǵash ret jerasty jáne jerústi sýlaryn keshendi paıdalaný qaǵıdaty engizildi, bul – Qazaqstannyń sý obektilerin birtutas júıe retinde qarastyrýǵa múmkindik beredi», dedi mınıstrliktiń Sý saıasaty departamentiniń dırektory Serikjan Beketaev.