Q.Sátbaev ýnıversıtetiniń 90 jyldyq mereıtoıyna arnalǵan is-sharalar aıasynda atalǵan oqý ornynda joǵary tehnologııalyq «FabLab SU» ortalyǵy ashyldy. Zerthanada stýdentter, ǵalymdar men tájirıbeli ınjenerler zamanaýı jabdyqtardy paıdalana otyryp, ozyq ıdeıalaryn júzege asyrady.
Jańa zerthana 3D prınterlermen, sandyq baǵdarlamalyq basqarý stanoktary, jobalaý men model jasaýǵa arnalǵan baǵdarlamalarmen qamtamasyz etilgen. Massachýsets tehnologııalyq ınstıtýtynyń standarttaryna negizdelip jasalǵan jahandyq «FabLab» zerthanalar qaýymdastyǵynyń bir bólshegi sanalady. Bul qaýymdastyq dúnıejúzinde 2 myńnan astam ınnovasııalyq ortalyqty biriktiredi. Tanymaldylyǵy joǵary uıymǵa kirý týraly kelisimge Sátbaev ýnıversıteti delegasııasy MIT ýnıversıtetine jasaǵan sapary barysynda qol jetkizdi.
Zerthananyń ashylý saltanatyna Ǵylym jáne joǵary bilim mınıstri Saıasat Nurbek qatysyp, ýnıversıtetterdi tek memleket qarjysyna ǵana emes, sondaı-aq bıznes esebinen de qoldaý kórsetip, túrlendirý qajettigin jetkizdi.
– Elimizde qarjylandyrýdyń 80 paıyzdan astamy memleket esebinen, ıaǵnı mınıstrlik bıýdjeti, granttyq jáne maqsattyq baǵdarlamalar tarapynan júzege asyp keledi. Mysaly, Amerıka elinde bul baǵyttyń 70 paıyzdan astamy jekemenshik korporasııalar esebinen qarjylandyrylady. Eger de buryn jabyq ǵylymı zertteý ınstıtýttaryna kóbirek kóńil bólingen bolsa, qazir álemdik tájirıbege sáıkes ýnıversıtetter ǵylymı oı-pikirdiń ortalyǵyna aınalyp otyr, – dedi mınıstr.
«MIT FabLab» zerthanasynyń basshysy Rýslan Muqanovtyń aıtýynsha, stýdentter munda jobalar ázirleýmen ǵana emes, qosymsha biliktilikti, ıaǵnı sıfrlyq jobalaýshy-ınjener, revers-ınjener jáne sandyq baǵdarlamalyq basqarý stanoktary operatory kásibı biliktiligin qatar meńgeredi. Zerthana oqý-jattyǵýǵa qajetti barlyq qural-jabdyqpen qamtylǵan.
«Fab Labs» zerthanalary kóbine jobalaý jáne praktıkalyq Stem-bilim berý platformasy retinde jıi paıdalanylady. Jeli búkil álemde ınjenerler men ónertapqyshtar arasynda ózara bilim almasýdy qoldaý arqyly ınklıýzıvti damýǵa yqpal etedi. Stýdentter ózderin qyzyqtyratyn ıdeıadan bastap, iske asyrýǵa deıingi barlyq óndiristik sıkldy iske asyrady.
Q.Sátbaev ýnıversıtetiniń rektory Meıram Begentaev MIT-pen aradaǵy yntymaqtastyq «zertteý júrgize otyryp oqytý» qaǵıdatyn tolyqtaı júzege asyrýǵa yqpal etetinin atap ótti. Al turaqty bolashaqty qamtamasyz etý úshin zertteýshiler men ónertapqyshtardyń kúsh-jigerin biriktirý nátıjesinde stýdentterdiń is-tájirıbedegi zamanaýı daǵdylary qalyptasady.
Zerthananyń ashylýyna Qazaqstanda biregeı tehnıkalyq keńistik qurǵan «Lenovo», «KazTechInnovations», «Best Vision Technologies» sekildi kóptegen jetekshi kompanııa atsalysty. Oǵan elimizdegi eń iri 3D-prınteri, úsh ólshemdi skaner jasaýǵa arnalǵan jabdyq, prototıp jasaýǵa arnalǵan tolyq tehnologııalyq jeli jáne «Dmg mori» kompanııasynyń óńdeý ortalyǵy ornatylǵan. Osynyń barlyǵy zerthanany tek oqý maqsatynda ǵana emes, naqty óndiristik tapsyrmalar men kommersııalyq jobalardy iske asyrý maqsatynda qoldanýdy maqsat etedi. Sondaı-aq bul zerthana sheteldik ýnıversıtetter zerthanalarymen yqpaldastyǵy aıasynda qol jetkizgen bilim, ınnovasııalyq jetistikterimen almasýǵa múmkindik beredi.
Q.Sátbaev ýnıversıtetindegi «FabLab» zerthanasynyń kelem deýshilerge esigi ár kez ashyq. Elimizdegi daryndy jas ınjenerlerge zerthanada jumys isteýge múmkindik kóp. Osyǵan baılanysty «FabLab» alańynda oqýshylardy oqytý maqsatynda Almaty mektepterimen kelisim jasaldy.
ALMATY