Qostanaıdaǵy «AgromashHoldıng kz» zaýyty metallýrgııa sehynyń bastyǵy Svetlana Cherepanova 32 jyldan beri metall óńdeý salasynda eńbek etip keledi. Tájirıbeli maman jetekshilik etetin seh shoq kósep, bolat balqytyp, aýyl sharýashylyǵy tehnıkalaryna qajet san alýan bólshekterdi quıyp shyǵarady.
Svetlananyń ata-anasy da kezinde Rýdnyıdaǵy ken-baıytý kombınatynda bolat quıýshy bolyp jumys istegen. «Meniń metallýrg mamandyǵyn tańdaýyma sol kisiler yqpal etti», deıdi seh bastyǵy.
1987 jyly Magnıtogorsk taý-ken metallýrgııa ınstıtýtyn oıdaǵydaı támamdap, Rýdnyıǵa oralǵan boıjetken birden metall quıý óndirisine aralasady. Áýeli bes jyldaı jergilikti taý-ken baıytý óndiristik birlestiginde ınjener bolyp jumys isteıdi. Al 1992 jyly Qostanaıdaǵy burynǵy dızel zaýyty, qazirgi «AgromashHoldıng KZ» zaýytyna aýysady.
«Qara jumystan eshqashan qoryqqan emespin. Instıtýtta sapaly bilim alyp, jan-jaqty tájirıbeden óttik. Ustazdarymyz aldymyzda kútip turǵan qıyndyqtardy jeńe bilýge, tabandy bolýǵa úıretti. Ákem de, anam da óndiriske kelgen adam tózimdi, qaıratty, aqyldy bolýy kerek, munda eshteńe ońaılyqpen jasalmaıdy degendi únemi qaıtalap, qulaǵyma sińirip otyratyn. Otyz jyldan asty, er-azamattarmen úzeńgilese eńbek etip kelemin. Biz kóbine ystyq temperatýrada jumys isteımiz, aýyr nárseni kóp kóteremiz. Sondyqtan, eń bastysy, munda densaýlyǵyń myqty bolýy kerek. Osynyń bárine óz basym tóselip aldym», deıdi Svetlana Anatolevna.
Búginde Svetlana basqaratyn metallýrgııa sehynda 8 adam jumys isteıdi, ózinen basqa jumysshylardyń bári – er adamdar.
«Olardyń bári – osy sehta kóp jyldan beri jumys istep kele jatqan óte tájirıbeli mamandar. О́z mindetterin aıtqyzbaı atqarady. Jumys barysynda meni únemi qoldap otyrady, kómekterin aıamaıdy. Negizi jastardan góri, osyndaı tájirıbesi mol eresek adamdarmen birge jumys istegen jaqsy. Jalpy, bizdiń ujymda óte tártipti, aıtqanyńdy eki etpeı oryndaıtyn, jaýapkershiligi joǵary bilikti mamandar jumys isteıdi», deıdi seh basshysy.
Svetlana Anatolevna sóz arasynda óndiriste bilikti kadrlardyń jetispeı jatqanyn da ańǵartyp qaldy. Aıtýynsha, búginde tájirıbeli jumysshynyń ornyn basatyn jas maman tabý ońaı emes. Esesine, óndiriske jan qalaýymen kelip, osy zaýytqa birjola ornyǵyp qalyp jatqan jastar da barshylyq.
Kúndelikti jumys barysynda tańnan keshke deıin bolat balqytyp, odan traktor, kombaınǵa ornatatyn túrli tehnıka bólshekterin quıyp shyǵaratyn qurysh minez, qaısar jannyń boıynan qashanda áıel adamǵa tán náziktik pen anaǵa tán meıirim shýaǵy esip turady.
Svetlana Cherepanovanyń óndiris salasyndaǵy kóp jylǵy eńbegi memleket tarapynan da joǵary baǵalanyp, taıaýda seh basshysy Astana tórinde Prezıdent Qasym-Jomart Toqaevtyń óz qolynan «Eńbek dańqy» ordenin aldy.
«Memleket basshysy osydan shamamen eki aı buryn Qostanaı oblysyna jumys saparymen kelgende bizdiń zaýytqa da at basyn burǵan. Sol kezde birinshi ret júzbe-júz kezdestim. Al ulttyq mereke – Respýblıka kúni qarsańynda Prezıdenttiń óz qolynan orden aldym. Bul – birinshiden, ekiniń birine buıyra bermeıtin úlken baqyt. Ekinshiden, elimizde óz isine berik, jumysyna adal adamnyń eńbegi eshqashan eleýsiz qalmaıdy, osyǵan kózim jetti. О́zim metallýrgter áýletinde týyp-óstim. Bizdiń áýlettiń metallýrgııa salasyndaǵy jalpy ótilin eseptep kórsem, 126 jyl bolady eken. Ata-anam ómir boıy osy salada eńbek etti. Qazir úlken ulym ózimmen birge jumys istep júr. О́mirimniń 42 jyly óndiriste ótti. Bir qaraǵanda, metallýrg bolý er adamdardyń ǵana enshisine jazylǵan sııaqty, biraq bizdiń zaýytta bul mańyzdy emes, áıel adam da, er adam da bir jumysty atqarady. Mysaly, biz sehta Selsıı baǵanasy boıynsha 1340 gradýs ystyqpen jumys isteımiz. Traktorlar men kombaındarǵa, dán sepkishter men destelegishterge arnalǵan túrli metall bólshekterdi quıamyz. Atap aıtqanda, ártúrli aýyl sharýashylyǵy tehnıkalary dońǵalaqtaryna arnalǵan kúpshekter, jetekshi tegershik – shkıvter, korpýstar, kronshteınder quıyp shyǵaramyz. Ol bólshekter keıin taǵy birneshe mehanıkalyq óńdeýden ótedi», deıdi seh basshysy.
Qostanaı oblysy