Kıberortalyq ınternet-alaıaqtyq pen hakerlik shabýyldarmen kúresýge baǵyttalǵan, dep habarlaıdy Egemen.kz Polisia.kz saıtyna silteme jasap.
Abaı aýdanynyń Zaton polısııa bóliminde jańa kıberortalyqtyń saltanatty ashylýy ótti. Is-shara qonaqtary zamanaýı jabdyqtardy jáne ortalyqtyń jumysyn uıymdastyrýdaǵy biregeı ádisti baǵalady.
Bul ortalyq ınternet alaıaqtyq, hakerlik shabýyldar, jeke málimetterdiń urlanýy jáne zııandy baǵdarlamalyq qamtamasyz etýdiń taralýy sııaqty qaýiptermen kúresýge baǵyttalǵan. 2024 jyly oblysta ınternet alaıaqtyqtyń 597 jaǵdaıy tirkelip, onyń 78 isi sotqa jiberilgen.
Aıta keteıik, joba Alikhan Bokeikhan University-diń quqyq fakýltetiniń qylmystyq-quqyqtyq pánder kafedrasynyń qoldaýymen júzege asyrylǵan. Ol 25 kásibı polısııa qyzmetkeri men stýdentterdiń kúsh-jigerin biriktirip, olardyń bilimderin praktıkada qoldanýǵa múmkindik beredi.
«Kıberortalyqtyń qurylýy – kıberqaýipter ósip jatqan zamanda qajet qadam. Biz endi sıfrlyq ortadaǵy qaýip-qaterlerge jedel áreket etip, azamattarymyzdyń qaýipsizdigin qamtamasyz etýge daıynbyz», dedi PD bastyǵynyń orynbasary Eldos Zakımov.
Jıynda Abaı oblysy polısııa departamentiniń bastyǵy Bektóre Sultan men Alikhan Bokeikhan University prezıdenti Shyryn Qurmanbaeva yntymaqtastyq týraly memorandýmǵa qol qoıdy. Bul qadam bilim berý mekemeleri men quqyq qorǵaý organdary arasyndaǵy seriktestikti nyǵaıtyp, bilikti mamandardy daıarlaý úshin jaǵdaı jasaıdy.
«Kıberortalyq bizdiń stýdentter úshin jańa múmkindikterge jol ashady. Mundaı jaǵdaıda tájirıbelik jumys júrgizý sıfrlyq álemge qajetti naǵyz mamandardy daıarlaýǵa múmkindik beredi», dedi Shyryn Qurmanbaeva.