Bakýde ótip jatqan BUU-nyń Klımattyń ózgerýi jónindegi negizdemelik konvensııasyna (COP29) qatysýshylardyń 29-konferensııasy aıasynda Qazaqstan eldegi alǵashqy «jasyl» kýrorttyń iske qosylǵanyn jarııalady, dep habarlaıdy Egemen.kz.
Aqmola oblysynyń Aqkól aýdanynda ornalasqan joba álemdik ekologııalyq standarttarǵa sáıkes keletin turaqty týrızm ınfraqurylymyn qurýǵa baǵyttalǵan.
Jobanyń alǵashqy kezeńderiniń biri 2023 jyly qonaqtarǵa esigin aıqara ashqan Wyndham Residences Aqkol qonaq úıiniń iske qosylýy edi. Atalǵan qonaqúı – ekologııalyq turaqtylyqtyń joǵary standarttaryn eskeretin nysan. Onyń qurylysynda jasyl dızaın jáne passıvti qurylys ádisteri, sonyń ishinde energııany únemdeıtin tehnologııalar men sýdy súzý júıesi paıdalanyldy, bul – energııa tutynýdy aıtarlyqtaı azaıtyp qana qoımaı, qorshaǵan ortaǵa áserdi azaıtady.
Wyndham Residences Aqkol qonaq úıi qazirdiń ózinde BUU-nyń turaqty damý jónindegi jahandyq bastamasyna qatysady, bul – jobanyń halyqaralyq arenadaǵy mańyzdylyǵyn kórsetedi.
Qazaqstanda alǵashqy «jasyl» kýrortty iske asyrý ekologııalyq taza týrızmdi damytýǵa jáne eldiń «jasyl» ekonomıkaǵa kóshýine mańyzdy qadam bolady.