Palata spıkeri Erlan Qoshanovtyń tóraǵalyǵymen Májilis Bıýrosy ótip, onda aldaǵy jalpy otyrystyń kún tártibi naqtylandy.
Depýtattardyń talqylaýyna «Akvaósirý týraly» Úkimet ázirlegen zań jobasy men oǵan ilespe túzetýlerdi birinshi oqylymda qaraý usynylady. Zań jobasy akvaósirýdi damytý salasyndaǵy qatynastardy retteıtin quqyqtyq tetikterdi, ınvestısııa tartýǵa jáne ekonomıkanyń osy sektoryna shaǵyn jáne orta bıznesti tartýǵa yqpal etý maqsatymen ázirlengen. Atap aıtqanda, sý qoımalaryn konkýrstyq negizde jáne konkýrstyq rásimdersiz berý tártibi belgilenedi. Sonymen qatar jeńildetilgen nesıelendirýge, eńbek ónimdiligin arttyrýdy ǵylymı qoldaýǵa jáne yntalandyrýǵa qosymsha memlekettik qoldaý sharalary men basqa da birqatar ózgeris engiziledi.
Aqparat, qoǵamdyq damý, mádenıet jáne muraǵat isi salalaryndaǵy normalardyń artyq (shamadan tys) zańnamalyq reglamenttelýin joıý máseleleri boıynsha zań jobasy ekinshi oqylymda qaralady.
Kún tártibinde birqatar halyqaralyq qujatty ratıfıkasııalaý týraly zań jobalary da bar. Bul – Saharanyń ońtústigine qaraı Afrıka elderine jáne Irakqa shekteýli jáne birtindep taratýdy júzege asyrýǵa múmkindik beretin Eýropa Qaıta qurý jáne damý bankin qurý týraly kelisim, ádettegi operasııalarǵa jarǵylyq kapıtaldyq shekteýdi joıý maqsatymen Eýropa Qaıta qurý jáne damý bankin qurý týraly kelisim, sondaı-aq memlekettik (mýnısıpaldyq) satyp alýdy júzege asyrý kezinde bank kepildikterin ózara taný týraly kelisim.
Sondaı-aq Májilis komıtetteri orys tili jónindegi halyqaralyq uıym qurý týraly ratıfıkasııalyq shartty jáne terrorızmdi qarjylandyrýǵa qarsy is-qımyl jónindegi Eýrazııalyq toptyń qyzmetine qatysty jańa zań jobasyn jumysqa qabyldaıdy.