Elordadaǵy L.N. Gýmılev atyndaǵy Eýrazııa ulttyq ýnıversıtetinde belgili jýrnalıst-ǵalym, professor, Bas redaktorlar klýbynyń birinshi vıse-prezıdenti Muratbek Toqtaǵazınniń 60 jyldyq mereıtoıyna oraı «Jýrnalıstıka men qazirgi medıakommýnıkasııa paradıgmalary: teorııalyq jáne praktıkalyq máseleleri» atty halyqaralyq ǵylymı-tájirıbelik konferensııa ótti, dep habarlaıdy Egemen.kz.
Is-sharaǵa Mádenıet jáne aqparat, Ǵylym jáne joǵary bilim mınıstrlikteriniń, TURKSOY halyqaralyq uıymynyń, Qazaqstan Jazýshylar odaǵynyń ókilderi, otandyq jáne sheteldik ǵalymdar, BAQ basshylary men stýdentter qatysty. Konferensııa barysynda Muratbek Balqybekulynyń shyǵarmashylyq joly týraly áserli baıandamalar oqyldy. Ásirese, onyń Aqmola qalasynyń tarıhı ataýyn qaıtarýdaǵy eńbegi erekshe atap ótildi.
Mereıtoıda Prezıdent keńesshisi, Ulttyq ǵylym akademııasynyń akademıgi Baýyrjan Omaruly óziniń baıandaýynda Muratbek Toqtaǵazınniń qaıratkerlik jáne shyǵarmashylyq qyrlaryna toqtaldy.
«Muratbek Toqtaǵazınniń ómiri úsh kezeńge bólinedi: stýdent, jýrnalıst, zertteýshi. Ol mektep jasynan bastap-aq qaıratker retinde qalyptasyp, qazaq baspasóziniń damýyna aıryqsha úles qosty. Onyń qajyrly eńbegi men tyń ıdeıalary sarydalany qazaqılandyrýǵa jáne Astananyń ulttyq kelbetin qalyptastyrýǵa serpin berdi», dedi ol.
Muratbek Toqtaǵazın 2010 jyly Ázilhan Nurshaıyqov shyǵarmashylyǵyna arnalǵan kandıdattyq dıssertasııa qorǵap, jýrnalıstıkanyń túrli janrlarynda 300-den astam maqala jarııalaǵan. Onyń «Aqmola úshin aıqas», «Kitap basý isindegi kommýnıkatıvti saıasat» atty kitaptary men kóptegen ǵylymı maqalasy jas zertteýshiler úshin qundy baǵyt-baǵdar bolyp otyr.