Zaısan kólin jaǵalaı jatqan Tuǵyl – túrlenip, gúldenip kele jatqan aýyldardyń biri. Balyqty kásip etip otyrǵan mekenniń áleýmettik ál-aýqaty da qarqyndy. Aýyldyq okrýgte jalpy bes fýtbol alańy bar. Kúni keshe ǵana jańa dene shynyqtyrý jáne saýyqtyrý kesheni ashylyp, aýyl jastary shat-shadyman kúı keshti.
Jańa keshenniń qurylysy 2023 jyly bastalǵan edi. Qurylysty «AN Groups» JShS merdigerlik kompanııasy merziminen bir aı buryn aıaqtap, aýyl turǵyndarynyń ıgiligine usynyp otyr.
Jańa keshen aýyl azamattarynyń bos ýaqyttaryn tıimdi ótkizýge arnalǵan oryn bolary anyq. Tıimdi ótkizip qana qoımaı, salamatty ómir saltyn ustanýǵa serpin beredi. Munda ár jastaǵy azamattar badmınton, basketbol, voleıbol, tennıs, armrestlıng, boks, qazaq kúresi sekildi sport túrlerimen aınalysa alady. Keshenniń barlyq sport zaldary zamanaýı sporttyq qural-jabdyqtarmen qamtamasyz etilgen.
– Mundaı sport kesheni bizge óte qajet edi. Budan bylaı árkim ózi qalaǵan sport túrlerimen erkin aınalysa alady. Bokspen shuǵyldanyp júrgenime alty jyl boldy. Buǵan deıin jattyǵýlar Aqjar aýylynda ótip turatyn. Endigi jerde osynaý keshennen kil myqty sportshylar shyǵaryna senim bildiremiz, – deıdi jas boksshy Ersultan Ermekuly.
Keıingi bes-alty jyldyń kóleminde Shyǵys Qazaqstan oblysynda sportty damytýǵa kóp kóńil bólinip keledi. Byltyrdyń ózinde oblysta 15 jańa sport nysany paıdalanýǵa berildi. Bir sózben, halyqtyń buqaralyq sportpen aınalysýyna aıtarlyqtaı jaǵdaı jasalyp jatyr.
Sport kesheniniń ashylý saltanatyna oblys ákiminiń birinshi orynbasary Nurymbet Saqtaǵanov arnaıy kelip, turǵyndardy quttyqtap, jańa keshendi tıimdi paıdalaný kerektigin atap ótti.
– Ár aýyldarda buqaralyq sportty damytý arqyly halyq densaýlyǵyn jaqsartý, jastardy salamatty ómir saltyna baýlý qajet. Sol maqsatta memleket osyndaı sport keshenderin kóptep salyp jatyr. Tuǵyldyń sportshylary tuǵyrdan kórine bersin! – dedi N.Saqtaǵanov.
Sondaı-aq Tuǵyl aýyldyq okrýgine qarasty Baıtoǵas aýylynda medısınalyq pýnkt boı kóterdi. Búgin-erteń onyń da lentasy qıylyp, halyqty qýantady.
Shyǵys Qazaqstan oblysy,
Tarbaǵataı aýdany,
Tuǵyl aýyly