Jańa ataýǵa ıe Alataý qalasynyń Eńbek shaǵyn aýdanynda «Jaıly mektep» jobasy aıasynda salynǵan úsh qabatty 600 oryndyq jańa mektep qoldanysqa berildi.
«О́ńirdegi bilim salasynyń basty máselesi – úshaýysymdy oqytý men oryn tapshylyǵy ekeni belgili. Sondyqtan máseleni sheshý maqsatynda osy jyly oblysta «Jaıly mektep» jobasy aıasynda 26, jeke ınvestor arqyly 4 jáne jergilikti bıýdjet esebinen 2 mektep qoldanysqa berý josparlanǵan. Bolashaq jastarymyzǵa jahandaný kezeńinde sapaly bilim men sanaly tárbıe berý mańyzdy. Endigi kezekte, oblysymyzdyń daryndy balalar sany búgingi jańa da jaıly mektepte bilim alatyn oqýshylarmen tolyǵatynyna senimdimin», dedi mekteptiń ashylý saltanatynda sóz alǵan Almaty oblysy ákiminiń birinshi orynbasary Nurlan Ábdirahym.
Sondaı-aq ol mektep qurylysyn sapaly ári ýaqtyly aıaqtaǵan merdiger kompanııa basshylyǵyna oblys ákiminiń Alǵys hatyn tabystady.
Alǵashqy qońyraýdyń syńǵyry estilip, esigi ashylǵan eńseli mekteptiń tabaldyryǵyn attaǵan oqýshylar men ustazdardyń júzderinen qýanysh lebi esti. Endi olardyń sabaq úlgerimin jaqsartyp, jan-jaqty damýyna esh kedergi joǵy belgili.
Sebebi zamanaýı úlgide salynǵan mektepte sapaly bilim alý úshin barlyq jaǵdaı qarastyrylǵan. Mektepte sońǵy úlgide jabdyqtalǵan kabınetter, erekshe bilim alýshylarǵa arnalǵan ınklıýzıvti ortalyq, sheberhana, kitaphana, robottehnıka, STEM jáne modıfıkasııaly kabınetter, sport zaly, ashana, májilis zaldary balalar ıgiligine qyzmet etetin bolady.
Almaty oblysy