XVII Halyqaralyq «Eýrazııa» kınofestıvali elimizdegi eń iri kıno oqıǵasy bolmaq. Talqy tarazysyna túskeli turǵan jumystar sarapshylardy janr alýandyǵymen qatar, mazmun tereńdigimin tańǵaldyrǵan. Bul týraly festıvaldiń irikteý komıssııasynyń tóraǵasy, fılosofııa ǵylymdarynyń doktory Aıbarsha Bójeeva aıtyp berdi, dep habarlaıdy Egemen.kz.
Irikteýge álemniń túkpir-túkpirinen 60-tan astam fılm túsken. Komıssııa múshesi qataryna otandyq jáne sheteldik kınosynshylar shaqyrylǵan. Olar usynylǵan týyndylardy muqııat zerdelep, tek talapqa saı keletin fılmderdi iriktep alǵan.
«Birinshi kezekte biz fılmderdiń oı tereńdigine nazar aýdardyq. Festıvaldik kıno – kóńil kóteretin kontent emes, bul biregeı týyndy. Ol kórermen kóńiline saýal tastaıdy, sóıte otyryp oǵan jaýap izdeýge umtyldyrady», deıdi Aıbarsha Bójeeva.
Irikteýden ótken fılmderdiń basym bóligi – avtorlyq týyndylar. Olar kópshilik úırengen dástúrli janr shekarasynan shyǵyp, qalyptasqan qaǵıdany syndyrýǵa tyrysady. Sol arqyly tyńnan túren salyp, jańa óris izdeıdi.
«Meniń favorıtim – fransýz fılmi «Disco boy». Bul bosqyndar týraly ekshn emes, ol adam bolmysynyń qabat-qabat qatparlary týraly tereń týyndy. Kútpegen fınal, pálsapalyq oı kórermendi erekshe estetıkalyq lázzatqa bóleıdi. Mundaı kıno tek Frensıs Koppola sııaqty myqty rejısserlerdiń deńgeıinde baǵalanady», deıdi komıssııa tóraǵasy.
Sondaı-aq Aıbarsha Bójeevanyń pikirinshe, búgin kóńil kóteretin kontent basymdyqqa ıe. Sondyqtan festıvaldik kıno qazir aýadaı qajet.
«Bul týyndylar ómirdiń tylsym ári tereń maǵynasyn uqtyryp, álemge kóńil kózimen qaraýǵa qaraýǵa múmkindik beredi. Jasyrynyp kelgen aqıqat sáýlesin sanamyzǵa túsiredi», dep qorytyndylady sarapshy.
Aıta keteıik dástúrli festıvaldiń negizin qalaýshy jáne uıymdastyrýshy – Mádenıet jáne aqparat mınıstrligi. Kınofestıvaldi tikeleı uıymdastyrý Sháken Aımanov atyndaǵy «Qazaqfılm» ulttyq kınostýdııasyna júktelgen.